Аҟәа. Жьҭаарамза 26, 2024 шықәса. Аԥсныпресс. Иахьа, жьҭаарамза 26 рзы Аҟәа ақалақь аҿы ихацыркхеит аҩратә марафон. Уи ареспублика акәақьқәа зегьи уи анҭыҵ аҟынтәигьы хыԥхьаӡара рацәала алахәылацәеи ахәаԥшцәеи аспорт абзиабаҩцәеи еизнагеит. Аҟәатәи амарафон актәи амш азы ахәыҷтәы аҩра мҩаԥысуан.
Аиԥхныҩрақәа ирылагаанӡа амарафон алахәылацәеи ахәаԥшцәеи Амҳаџьыраа Рыԥшаҳәа аҿы инарҭбаау акультура-арлахҿыхратә программа рзыԥшуп.
Зегьы реиҳа анырра бзиа узҭо усмҩаԥгатәны иҟалеит амилаҭтә чысхкқәаеи аҩи рфестиваль. Амарафон асасцәа ибеиоу Аԥсны атрадициақәеи акультуреи рдунеи аҽагәылахалара азы хра злоу алшарақәа рзаԥҵахоит, ргьамақәа рбар алшоит Аԥсны акулинартә традициа зырбеио хкы рацәала ачысхкқәа, арыжәтә, ашәырӡқәа, ажьырӡы, уҳәа.
Активла аԥсшьараамҭа ахгара бзиа избо рзы аԥышәа змоу аинструкторцәа рнапхгарала ахыци ахәымпали рыла ахысраҿы рымчқәа ԥыршәарц азы алшара рзаԥҵахоит.
Амузыкатә фестиваль аплошьадка аҿы еизнагеит анагӡаҩ ҿарацәа. Ахәаԥшцәа агәырӷьареи алахҿыхреи зцыз зеиӷьаҟам анырра рнаҭеит имҩаԥгаз аконцерт.
Ахаа-мыхаақәа рыбзиабаҩцәа рзы еиҿкаахеит аԥсуа хаамыхаа-хкы – аџьынџьыхәа аҟаҵаразы аҟазара акласс. Аҟәазацәа асасцәа ари агәырхаага аҟаҵара иаҵоу амаӡақәа рзеиҭарҳәон, иара убас урҭ ҿыц иҟаҵоу ачыс агьама ддырбон.
«Шықәсыки бжаки рыҩныҵҟа ҳара, Урыстәыла, Ҟазахсҭан, Белоруссиа, уҳәа егьырҭ атәылақәа рҟынтәи алахәылацәа ахәыҷтәы атлетикатә еиԥхныҩлара адагьы Аԥсны акультурагьы атәы еилыркаарц азы ари ахҭыс ҳҽазыҟаҳҵон.
Иахьа аицлабрақәа рхы аладырхәуеит 13 шықәса зхымҵыц ҩышә-ҩык рҟынӡа ахәыҷқәа.
Уаҵәы Аԥсны имҩаԥгахоит 42 километра рҟынӡа инаӡо адистанциа ала актәи аиԥхыныҩлара «Аҟәа-Амарафон». Шәареи ҳареи иахьа Аԥсны атлетика лас аҭоурых аҿиара ҳалахуп, убри аан зеиӷьаҟам, убла хызуа аԥшӡарақәа, амш бзиа, аҳауа зҩыда, афатә хаа, иааидкыланы анасыԥ аиуразы алшара ҳамоуп», – ҳәа Аԥсныпресс акорреспондент диҿцәажәо еиҭалҳәеит амарафон аиҿкааҩ, «Аҩратә ҭоурых» («Беговая история») аиҿкааҩ, адиректор Хада Анастасиа Мачульскаиа.
Амш ахҭыс хаданы иҟалеит ахәыҷтәы еиԥхныҩлара. Уи рхы аладырхәит 13 шықәса рҟынӡа зхыҵуа 200-ҩык рҟынӡа Аԥсны, Белорусь, Ҟазахсҭан, Каргызҭан атәылақәа рҟынтәи аспортсмен ҿарацәа.
6-9 шықәса зхыҵуа аспортсменцәа рыбжьара 1 км. рҟынӡа инаӡо адистанциа ала аиԥхныҩлара аҿы аиааира ргеит Софиа Чаабали Ервин Асланиани, аҩбатәи аҭыԥ аҿы – Наала Бессоновеи Николаи Савинкини, ахԥатәи аҭыԥ ааныркылеит Манана Ашьхаруеи Кирилл Макарови.
10-13 шықәса зхыҵуа аспортсменцәа рыбжьара аиааира ргеит Ангелина Рушьаки Сабри Нанбеи, аҩбатәи аҭыԥ ааныркылеит Анастасиа Ковалиовеи Алеқсеи Бондари, ахԥатәи аҭыԥ ааныркылеит - Даниел Туркиеи Ерик Асланиани.
500 м. рҟынӡа инаӡо адистанциа ала аҩрақәа зхы алазырхәыз 5 шықәса рҟынӡа зхыҵуа ахәыҷқәа зегьы агәаларшәагатә ҳамҭақәеи амедалқәеи ранашьахеит.
6-9, 10-13 шықәса зхыҵуа ақәратә категориақәа ирыҵанакуа аспортсменцәа рыбжьара аиааирақәеи аԥхьахәқәеи згаз иҷыдоу ахраҿақәа ранаршьеит.
Амҽыша, жьҭаарамза 27 рзы, 42,2 км., 21,1 км. 5 км. рҟынӡа инаӡо адистанциа ала аиҳабацәа рыбжьара аиԥхныҩларақәа мҩаԥысуеит.
Асааҭ 07:00 рзы – астарт-фиништә қалақь аартра, аҽыԥсахырҭақәеи аҵәахырҭа акамерақәеи русура алагара;
Асааҭ 08:30 рзы – 5 км. рҟынӡа инаӡо адистанциа ахь астарт;
Асааҭ 09:10 рзы – 42,2 км., 21,1 км. рҟынӡа инаӡо адистанциақәа рахь аҩрақәа рыстарт.
Адистанциақәа рымҩасра азы иазоужьу аамҭа алимитқәа:
42,2 км. – 6 сааҭ;
21,1 км. – 3 сааҭки 50 минуҭи;
5 км. – 50 минуҭ.
Аҳамҭақәа ранашьара ацеремониа:
Асааҭ 09:40 рзы – 5 км. рҟынӡа инаӡо адистанциа ала абсолиуттә аԥхьахәгара аҿы аиааирагаҩцәеи аԥхьахәгаҩцәеи аҳамҭақәа ранашьара;
Асааҭ 12:30 рзы – 42.2 км., 21 км. рҟынӡа инаӡо адистанциа ала абсолиуттә аԥхьахәгара аҿы аиааирагаҩцәеи аԥхьахәгаҩцәеи аҳамҭақәа ранашьара;
Амарафон амҩаԥгара аҭыԥ: Пушкин имҩа №1, Б. Шьынқәба ихьӡ зху апарк.
Амарафон Аԥсны аҿари аспорти русқәа рзы Аҳәынҭқарратә Еилаки амарафон аспонсор хада – аспорттә тауарқәа рзы урыстәылатәи агипермаркет «Деспорт» адгылареи, иара убас амобилтә еимадара Аилазаара «А-Мобаил» адиректор Хада, Аԥсны атриатлон Афедерациа апрезидент Борис Барцыц хаҭала иҟаиҵаз ацхыраареи ирыбзораны имҩаԥгахоит.
