Аҟәа. Жьҭаарамза 25, 2024 шықәса. Аԥсныпресс. Жьҭаарамза 26 – 27 рзы Аԥсны аҳҭнықалақь аҿы раԥхьаӡа акәны имҩаԥгахоит «Аҟәатәи амарафон». Уи рхы аладырхәраны иҟоуп Аԥсны, Белоруссиа, Ҟазахсҭан рҟынтәи 600 - ҩык инареиҳаны аспортсменцәа.
Аҟәатәи амарафон ахәыҷтәы еиԥхныҩлара жьҭаарамза 26, 2024 шықәса рзы Амҳаџьыраа Рыԥшаҳәа аҿы имҩаԥысуеит.
Аҩрақәа реихшанҵа:
Асааҭ 15:40 рзы – абаҩрҵәыра аҟаҵара;
Асааҭ 16:00 – 16:10 рзы – 5 шықәса рҟынӡа зхыҵуа ахәыҷқәа уахь иналаҵаны рзы 500 метра рҟынӡа инаӡо адистанциа ала аҩра;
Асааҭ 16:10 – 16:20 рзы – 6 – 9 шықәса зхыҵуа ахәыҷқәа рзы 1 км. рҟынӡа инаӡо адистанциа ала аҩра;
Асааҭ 16:20 – 16:30 рзы – 10 - 13 шықәса зхыҵуа ахәыҷқәа рзы 1 км. рҟынӡа инаӡо адистанциа ала аҩра;
Асааҭ 16:45 рзы – 6-9, 10-13 шықәса зхыҵуа акатегориа иаҵанакуа рыбжьара аиааирақәеи аԥхьахәқәеи згаз аҳамҭақәа ранашьара мҩаԥгахоит.
Здистанциа ала қәҿиарала афиниш аҟынӡа инаӡаз ахәыҷқәа зегьы агәаларшәагатә ҳамҭақәа ранашьахоит.
6-9, 10-13 шықәса зхыҵуа ақәратә категориа иаҵанакуа рыбжьара аиааирақәеи аԥхьахәқәеи згаз иҷыдоу аҳамҭақәа ранашьахоит.
Аиҳабацәа реиԥхныҩлара мҩаԥгахоит жьҭаарамза 27 рзы.
Аҩрақәа реихшанҵа:
Асааҭ 07:00 рзы – астарт-фиништә қалақь аартра, аҽыԥсахырҭақәеи аҵәахырҭа акамерақәеи русура алагара;
Асааҭ 08:30 рзы – 5 км. рҟынӡа инаӡо адистанциа ахь астарт;
Асааҭ 09:10 рзы – 42,2 км., 21,1 км. рҟынӡа инаӡо адистанциақәа рахь аҩрақәа рыстарт.
Адистанциақәа рымҩасра азы иазоужьу аамҭа алимитқәа:
42,2 км. – 6 сааҭ;
21,1 км. – 3 сааҭки 50 минуҭи;
5 км. – 50 минуҭ.
Аҳамҭақәа ранашьара ацеремониа:
Асааҭ 09:40 рзы – 5 км. рҟынӡа инаӡо адистанциа ала абсолиуттә аԥхьахәгара аҿы аиааирагаҩцәеи аԥхьахәгаҩцәеи аҳамҭақәа ранашьара;
Асааҭ 12:30 рзы – 42.2 км., 21 км. рҟынӡа инаӡо адистанциа ала абсолиуттә аԥхьахәгара аҿы аиааирагаҩцәеи аԥхьахәгаҩцәеи аҳамҭақәа ранашьара;
Аспорттә еиԥхныҩларақәа рнаҩс амарафон алахәылацәеи асасцәеи ирзыԥшуп инарҭбаау акультуратә программа: амузыка, акәашарақәа, амилаҭтә крыфареи аҩыҟаҵареи ирызку афестивальқәа. Амарафон уи алахәылацәа атрасса аҿы аспорттә мчқәа рԥышәара адагьы ибеиоу Аԥсны атрадициақәеи акультуреи рдунеи аҽагәылахалара азы алшарақәа рзаԥнаҵоит.
Аҩрақәа рлахәылацәа астарттә номерқәа рызшара:
Ахәаша, жьҭаарамза 25 рзы – асааҭ 11:00 инаркны асааҭ 20:00 рҟынӡа;
асабша, жьҭаарамза 26 рзы – асааҭ 10:00 инаркны асааҭ 19:00 рҟынӡа;
амҽыша, жьҭаарамза 27 рзы – асааҭ 07:00 инаркны асааҭ 08:00 рҟынӡа.
Амарафон амҩаԥгара аҭыԥ: Пушкин имҩа №1, Б. Шьынқәба ихьӡ зху апарк.
«Аҟәатәи амарафон» Аԥсны атлетика лас аҿиара иацхраауеит, ҳәа игәаанагара иҳәеит Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба. «Ари акыр зҵазкуа, идуу аспорттә хҭысуп, уи ҳара зегьы аҽазыҟцаҵара ҳаҿуп. Сынтәа ҳара Аԥсны атлетика лас шәышықәса ахыҵра азгәаҳҭоит, ари аныҳәа ду иацлоит даҽа ныҳәа шьахәк – «Аҟәатәи амарафон», — ҳәа Sputnik-Аԥсны иҩаԥысыз апресс-конференциа аҿы иазгәеиҭеит Ҭарашь Ҳагба.
Аҟәатәи амарафон — аспорттә усмҩаԥгатә адагьы ахҭыстә туризм акыр зҵазкуа факторны иҟоуп, ҳәа илыԥхьаӡоит амарафон амбассадор, акультура-усутә плошьадка «Гәыма» анапхгаҩы Хьыбла Возба.
Амарафон аҳәаақәа ирҭагӡаны, жьҭаарамза 26- 27 рзы Аҟәа ақалақь аҿы аус аулоит аҭыԥантәи аҭыжьыҩцәа раалыҵ ахәаахәҭратә цәыргақәҵа.
«Ҳара ҳасасцәа алшара роуеит аԥсуа чысқәеи аҩи, иара убас амандарина иалху ашәырӡ ргьама абара, еиуеиԥшым аҟазара-аклассқәа рылахәхара. Амарафон алахәылацәа алшара роуеит итрадициатәу аԥсуа спорт хкы абара. Ҳара ааԥхьара раҳҭеит ахыци ахәымпали рыла ахысра Афедерациа ахаҭарнакцәа», – ҳәа Sputnik-Аԥсны имҩаԥгаз апресс-конференциа аҿы еиҭалҳәеит лара.
Амарафон Аԥсны аҿари аспорти русқәа рзы Аҳәынҭқарратә Еилаки амарафон аспонсор хада – аспорттә тауарқәа рзы урыстәылатәи агипермаркет «Деспорт» адгылареи, иара убас амобилтә еимадара Аилазаара «А-Мобаил» адиректор Хада, Аԥсны атриатлон Афедерациа апрезидент Борис Барцыц хаҭала иҟаиҵаз ацхыраареи ирыбзораны имҩаԥгахоит.
