«Ҳара имҩаԥааго  абжьааԥнытәи аҭҵаарадырратә конференциаӡам, ҳара Аԥсны аҭҵаарадырра аҿиара аҭоурых аҟны адаҟьа ҿыц ааҳартуеит. 2022 шықәсазы ҳара имҩаԥаагеит Аԥсны аҭҵаарадыррақәа Ракадемиа 25 шықәса ахыҵра иазкыз Аԥсны аҵарауаа ҿарацәа актәи рфорум. Шәыԥсадгьыл ԥхьаҟатәи аԥеиԥш шәара шәнапы иануп. Анаука амҩа алхраан шәара еилышәкаауазар ҟаларын уи шаҟа имариам, аха сара агәра ганы сыҟоуп шәара аихьӡара дуқәеи имаҷымкәа ақәҿиарақәеи шышәзыԥшу» - ҳәа иҳәеит Аԥсны аҭҵаарадыррақәа Ракадемиа аиҳабы Зураб Џьапуа.

Зураб Џьапуа иажәақәа рыла, аҭҵаарадырратә форум ҩышықәса рахь знык имҩаԥгахалоит, аусумҭақәа хазы еидкылан иҭыжьлахоит. Џьапуа агәыӷра ааирԥшит 2026 шықәса инаркны афорум жәларбжьаратәи аҟазшьа аиуп, Урыстәылатәи аҵарауаагьы уи рхы аладырхәып ҳәа.

Аԥсны аҭҵаарадыррақәа Ракадемиа академик,  абиологиатә наукақәа  рдоктор Сергеи Бебиа еизаз дрыдныҳәало иҳәеит: «Анаука ахамеигӡара аҭахуп, уи адагьы уаҳа ԥсыхәа ыҟам. Сара агәыӷра сымоуп шәара зегьы идырны, цқьа еилкааны аԥсуа наукатә еилазаара шәахәҭакны шәҟаларц шышәыӡбаз, доусы шәыгәҭакқәа рынагӡараҿы  аинтерес зҵоу, аха зынӡа имариам амҩа ду шәзыԥшуп… Иахьа шәара анаукаҿы раԥхьатәи ашьаҿақәа ҟашәҵоит, аха ҵабыргны шәҵарауаахарц азы акыр аџьабаа шәбар акәхоит, иааиԥмырҟьаӡакәа аҿиара, адыррақәа реихаҳара шәҽазышәкуазароуп», – ҳәа иҳәеит Сергеи Бебиа.

Аҭҵаарадыррақәа Ракадемиа академикцәа Лиосик Аибеи  Ианварби Екбеи, аҭҵаарадыррақәа Ракадемиа алахәыла-корреспондент Валентин Коӷониа  рколлега ҿарацәа ԥхьаҟатәи рнаукатә усураҿы ақәҿиарақәеи аманшәалареи рзеиӷьаршьеит.

Аҩбатәи афорум 2022 шықәсазы имҩаԥысыз актәи афорум атрадициақәа иацнаҵоит, уи аԥышәаеимадареи адискуссиақәа рымҩаԥгареи Аԥсны анаукатә еилазаара ҿыц ашьақәгылареи рзы платформаны аҟалара иаҿуп.

Аҩбатәи афорум аусура аламҭалазы иҭыжьын анаукатә ажәахәқәа реизга «Аԥсны аҵарауаҩ ҿарацәа актәи рфорум. Аԥсны аҭҵаарадыррақәа Ракадемиа 25 шықәса ахыҵра иазку аконференциа аматериалқәа». («Первый Абхазский форум молодых ученых. Материалы научной конференции, посвященной 25-летию Академии наук Абхазии) (абҵарамза 2-3, 2022 шықәса)».

Анаукатә форум аҳәаақәа ирҭагӡаны рыдгалара мҩаԥгахоит абарҭ ахырхарҭақәа рыла аусумҭақәа: агуманитартә, асоциалтә, ауаажәларратә наукақәа, афизика-математикатәии амедика-биологиатәи анаукақәа.

Афорум аиҿкааҩцәа агәыӷра рымоуп аконференциа  Аԥсны анаукатә еилазаара аҿиара ишацхраауа, иара убас хадара злоу аҭҵаарадырратә темақәеи апроблемақәеи рызхьаԥшра шалыршахо.

Аԥсны аҵарауаа ҿарацәа рфорум мҩаԥысуеит жьҭаара 24 инаркны 25 рҟынӡа. Еиҿнакааит – Аԥсны аҭҵаарадыррақәа Ракадемиа.