Аҟәа. Жьҭаарамза 24, 2024 шықәса. Аԥсныпресс. Аԥснынтәи Курсктәи аобласть ахь идәықәҵаз агуманитартә цхыраара иарбоу урыстәылатәи арегион ахаҭарнакцәа ирыҭоуп. 30 тонна рҟынӡа инаӡо афатә аалыҵқәа, аԥатлыкақәа ирҭоу аӡрыжәтә, ахатәы гигиена ахархәагақәа, уҳәа рыла еилоу агуманитартә цхыраара украинатәи арбџьармчқәа рқәылара аҟынтәи ааха зауз Курсктәи аобласть ауааԥсыра рзы еизыргеит хазхаҭалатәи ауааи аиуристтә хаҿқәеи, иара убас ареспублика аҿы аус зуа еиуеиԥшым анаплакқәеи аиҿкаарақәеи.
Агуманитартә еидара иацны ицаз Аԥсны Иҷыдоу аҭагылазаашьақәа рминстр Лев Кәыҵниа аобласть Анапхгараҭара ахаҭарнакцәа дырԥылеит, ахәҭакахьала, аобласть Анапхгара ахантәаҩы ихаҭыԥуаҩ Михаил Горбунов. Иара Курсктәи аобласть агубернатор Алеқсеи Смирнови арегион ауааԥсыреи рыхьӡала Аԥсны анапхгареи ауааԥсыреи иҟарҵаз ацхырааразы иҭабуп ҳәа иҳәеит.
Аиԥылараҿы агуманитартә усхкы аганахьала аусеицура азҵаарақәа ирылацәажәеит. Иалацәажәеит иара убас Курсктәи аобласть аҟынтәи ахәыҷқәа рреабилитациа азы Аԥсны рыԥсшьара аиҿкаара азҵаарагьы.
Аобласть Анапхгара аӡбамҭала Лев Кәыҵниа арегион агәаларшәагатә медал ианаршьеит.
Аԥсны Иҷыдоу аҭагылазаашьақәа Рминистрра ахада иара убас Курсктәи аобласть асоциалтә еиқәыршәара, анреи ахәыҷреи Рминистрра аҿы аиԥыларақәа мҩаԥигеит.
Ареспублика аиқәырхаратә Хылаԥшырҭа ахада Курскҟа диццеит Очамчыра ақалақь аԥыԥшра-еиқәырхаратә ҟәша аиҳабы, аполковник Мурман Ԥачлиа.
