Аҟәа. Жьҭаарамза 23, 2024 шықәса. Аԥсныпресс. Жьҭаараза 25 – 27 рзы «Аҟәа-Марафон» аусмҩаԥгатәқәа мҩаԥыслоит.
Жьҭаарамза 27 рзы 42,2 км., 21,1 км., 5 км. рҟынӡа инаӡо адистанциақәа рҿы амарафон алахәылацәа еиҳабацәа рыҩҩрақәа мҩаԥысуеит. Убри инамаданы, аҳҭнықалақь амҩақәак рҿы атранспорт аныҟәара аԥкрақәа алагалахоит, ҳәа адырра ҟаиҵеит Аҟәа ақалақь аҩныҵҟатәи аусқәа Русбарҭа аиҳабы ихаҭыԥуаҩ Ныгәзар Чычба.
Амаршрутқәа зегьы рыла атроллеибусқәа рныҟәара аанкылахоит.
Аҭынчра апроспект ала зынӡа автотранспорт аныҟәара аанкылахоит.
Адлеиба имҩа ахәҭак аҿы, аангыларҭа «Ауарашршыга зауад» аҟынтәи Адлеиба имҩа аҟынӡа. Иарбоу амҩа ахәҭа аҿы аамҭала ганкахьлатәи, цәаҳәак ала аныҟәара шьақәыргылахоит.
Имам Шамиль имҩаеихысырҭа инаркны Аҭынчра апроспект аҟынӡеи Аҭынчра апоспект аҟынтәи Лакоба имҩа аҟынӡеи.
Лакоба имҩала асасааирҭа «Интер-Сухум» аҟынтәи «Ацҳа Ҟаԥшь» аҟынӡа атранспорт аныҟәара аԥкрақәа алагалахоит.
Аныҟәараан амҩа арымарахьтәи ацәаҳәа атранспорт иазкхоит, арӷьаратәи – амарафон алахәылацәа рзы.
Коӷониа имҩала инхо, иара убас уи иазааигәаны инхо ауааԥсыра рзы Џьонуа имҩеи Аршба имҩеи рыла аныҟәаразы апунктқәа аартхоит.
Акьыртаа имҩала ахәҭакахьала – «Ацҳа Ҟаԥшь» аҟынтәи абжьаратәи ашкол №14 аҟынӡа хәҭакахьала аныҟәаразы аԥкрақәа алагалахоит . Атранспорт азы иазоужьхоит атроллеибустә цәаҳәа. Амҩасырҭа арыӷьарахьала амарафон алахәылацәа рзы иаркхоит.
Кәыдрытәи ашоссе ала – абжьаратәи ашкол №14 аҟынтәи Киалашәыртәи ацҳа аҟынӡа аныҟәара ԥкхоит. Ацәаҳәақәа руак ала автотранпорт азы ареверсивтә ныҟәара еиҿкаахоит.
«Ҳаҭыр зқәу ауаажәлар, жьҭаараза 27 рзы иалагалахо аныҟәаразы аԥкрақәа инарымаданы, даара аҳәара ҟаҳҵоит Аҟәа агәы иахьаҵанакуа шәхатә транспорт ала аныҟәара аамҭала мап ацәышәкырц», – ҳәа аҟәааи аҳҭнықалақь асасцәеи рахь ихы рханы аҳәаҭа ҟаиҵеит Ныгәзар Чычба.
Амҩақәа раркра мҩаԥыслоит асааҭ 7 инаркны 16 рҟынӡа. Амарафон анхыркәшахалак ашьҭахь аԥкрақәа зегьы аԥыххоит.
