Аҟәа. Жьҭаарамза 23, 2024 шықәса. Аԥсныпресс. Аҳәынҭқарра Ахада ихаҭыԥуаҩ Бадра Гәынба аҳҭнықалақь аҿы жьҭаараза 25 – 27 рзы имҩаԥысраны иҟоу «Аҟәа-Марафон» аҽазыҟаҵара азҵаарақәа ирызкыз аилатәара мҩаԥигеит, ҳәа адырра ҟанаҵоит Аҳәынҭқарра Ахада ипресс-маҵзура.
Аилатәара рхы аладырхәит атәыла аҩныҵҟатәи аусқәа рминистр Роберт Киут, аминистр ихаҭыԥуаҩ Беслан Ҷкадуа, аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, Аҟәа ақалақь ахада ихаҭыԥуаҩ Авҭондил Сурманиӡе, ақалақьтә усбарҭақәа рхаҭарнакцәеи аусмҩаԥгатә аиҿкааратә Еилакы алахәылацәеи.
Аҳәынҭқарра Ахада ихаҭыԥуаҩ амассатә спорттә усҩаԥгатә амҩаԥгара аҵак ду шаҵоу азгәеиҭеит. Ас еиԥш иҟоу амарафонқәа адунеи атәылақәа жәпакы раҳҭнықалақьқәа рҿы лассы-лассы еиҿкаахоит. Уи иажәақәа рыла, згәабзиара иацкаԥшны анхашьа апропаганда аҟаҵара адагьы, амарафон атәыла аимиџь ашьҭыхра аҿы акыр зҵазкуа ароль нанагӡоит. Бадра Гәынба иара убас аусмҩаԥгатә аиҿкаара, азинеиҿкаара аиқәыршәареи иара убас уи алахәылацәа ршәарҭадара алыршареи рзы иахәҭоу зегьы аҟаҵара азы ааԥхьара ҟаиҵеит.
Аԥсны аҿари аспорт рзы Аҳәынҭқарратә Еилакы ахантәаҩы Ҭарашь Ҳагба иажәақәа рыла, жьҭаарамза 27 амш актәи азыбжазы Аҟәа ақалақь мҩадуқәак рҿы аамҭалатәи аԥкрақәа алагалатәхоит, Урыстәылатәи Афедерациа аҟынтәи амарафон рхы аладырхәраны иҟоуп 700-ҩык инареиҳаны. Ирзыԥшуп иара убас Белоруссиеи Ҟазахсҭани рҟынтәи алахәылацәа. Жьҭаарамза 26 рзы иҩаԥысраны иҟоуп еиуеиԥшым адистанциақәа рыла ахәыҷтәы еиԥхныҩларақәа, жьҭаарамза 27 рзы амарафон иацырҵоит аиҳабацәа. Аусмҩаԥгатә аҳәаақәа ирҭагӡаны имҩаԥысраны иҟоуп амилаҭтә чысқәеи аҩи рфестиваль, аҭыԥантәи аҭыжьыҩцәа раалыҵ ацәыргақәҵа, иара убас аԥснытәи арҿиаратә коллективқәа злаху аконцертқәа.
Амарафон апрограмма иалагалоуп 42,2 километр рҟынӡа инаӡо адистанциаҿы аҩра, уи иахҟьаны жьҭаарамза 27 амш актәи азыбжазы Аҟәа ақалақь аҿы автотранспорт аныҟара амаршрутқәа ԥсахтәхар акәхоит. Хазы игоу амҩақәа рҿы аамҭала амашьынақәа рныҟәара аганахьала аԥкрақәа алагалахар алшоит. Атәыла аҩныҵҟатәи аусқәа рминистр Роберт Киут амҩақәа рҿы ашәарҭадара аиҿкаараҿы Автоҳәынҭинспекциа аусзуҩцәа аҩныҵҟатәи аусқәа Рминистрра егьырҭ аҟәшеиҵақәа русзуҩцәа рыцхраалоит ҳәа иазгәеиҭеит.
Бадра Гәынба амарафон амҩаԥысраан амҩатә ныҟәара ахсаала аԥҵазарц, насгьы есыҽны амассатә информациа ахархәгақәа рыла ауааԥсыра иҟалар зылшо аиҭакрақәа рзы адырра рыҭалазарц азы анапынҵа ҟаиҵеит. Уи иара убас амарафон аиҿкааҩцәа, аҩныҵҟатәи аусқәа Рминистрра анапхгараҭара, Аҟәа ақалақь Ахадара рахь аҳәара ҟаиҵеит амарафон амҩаԥысра аамҭа аҩныҵҟа излауа ала аҳҭнықалақь ауааԥсыреи асасцәеи зыргәамҵуа ахҭысқәа рырмаҷра алдыршарц азы. Аҳәынҭқарра Ахада ихаҭыԥуаҩ ауааԥсыра рахь ари акыр зҵазкуа аспорттә усмҩаԥгатә амҩаԥгара амш аҽны аамҭа кьаҿ иалагӡаны иҟалар зылшо аԥкрақәа рганхьала аилкаара аадырԥшырц, мыцхәы имгәамҵырц азы ааԥхьара ҟаиҵеит.
Хыхь ишаҳҳәахьоу еиԥш, «Аҟәа-Марафон» мҩаԥгахоит Аԥсны аҳҭнықалақь аҟны жьҭаарамза 25-27 рзы. Амарафон аҳәаақәа ирҭагӡаны имҩаԥгахоит амузыкатә фестиваль, амилаҭтә крыфареи амилаҭтә ҩи афестивальқәеи. Аусмҩаԥгатә мҩаԥнагоит аилахәыра «Беговая История» Аԥсны Аҿари аспорти рзы Аҳәынҭқарратә Еилаки Аԥсны атриатлон Афедерациеи рыцхыраарала.
