Аиԥылара аҿы ҷыдала ахшыҩзышьҭра аҭан ақыҭанхамҩатә сезон аан Аԥснынтәи ииагахо ақыҭанхамҩатә аалыҵ аганахьала аҳазалхратә операциақәа еиҳа ирласны рымҩаԥгара алыршара иадҳәалоу азҵаарақәа. Иахьатәи амш азы Аԥснынтәи Урыстәылаҟа ииагахеит 370 тонна рҟынӡа амандарина, 140 тонна афеихоа, 18 тонна ахәырма, 6 тоннак алимон, 170 тонна араса. Ирылацәажәеит иара убас Аԥсны иаадрыхуа ақыҭанхамҩатә аалыҵ ахкқәеи амҽхаки ахәԥсатә политика, уҳәа аинформациа ала аимадара ахымԥадатәра, ирыдҳәалоу азҵаарақәа.

Урыстәыла Афедералтә ҳазалхратә Маҵзура ахаҭарнак аҳазалхартә операциақәа рынагӡара «аццакра» раԥхьа иргыланы адекларантцәа роуп изыдҳәалоу ҳәа иазгәеиҭеит.

Аиԥылара аихшьаалақәа ҟаҵо, аганқәа ицәырҵуа азҵаарақәа аҩганктәи аформат ала оперативла аӡбара алыршаразы еиқәшаҳаҭхеит.

Урыстәыла аганахьала аилатәара рхы аладырхәит  Краснодартәи атәылаҿацә аҳазалхра аиҳабы инапынҵақәа назыгӡо Павел Барманов, Ганрацәалатәи амашьынақәа роушьҭра-гәаҭаратә Ҭыԥ «Адлер» аиҳабы Алеқсеи Быков, Ареспублика Аԥсны иҟоу Урыстәыла Афедералтә ҳазалхратә Маҵзура ахаҭарнак Константин Козлов, Урыстәыла Афедералтә ҳазалхратә Маҵзура (аҷыдалкаатә) Аԥснытәи аҳазалхратә ԥыԥшырҭа аиҳабы Игорь Титаренко, иара убас авидеоконференциа арежим ала аиԥылара рхы аладырхәит  – «Урыстәыла Афедералтә ҳазалхратә Маҵзура амониторинги аоперативтә хылаԥшреи Рцентр» Аусбарҭа Хада ахаҭарнакцәа.

Аԥснытәи аделегациа аилазаараҿы иҟан Аҳәынҭқарратә ҳазалхратә Еилакы ахантәаҩы ихаҭыԥуаҩ Зураб Ашәба, Аҳазалхратә шәҟәҭагалареи аҳазалхратә хылаԥшреи рзы Аусбарҭа Хада аиҳабы Џьамал Цәеиба, Аҳазалхратә статистикеи анализи рзы Аусбарҭа аиҳабы Асида Кәыҵниа, азиндырратә ҟәша аиҳабы Анана Гогохьиа, аҳазалхратә Ҭыԥ «Ԥсоу» аиҳабы Алиас Хьишба, уҳәа убас  егьырҭ ахаҭарнакцәагьы.

Абри азы адырра ҟанаҵоит Краснодартәи атәылаҿацә Шәача ақалақь ала аҳазалхратә Маҵзура апресс-маҵзура.