1994 шықәса инаркны  Е.П. Шьаҟрыл – Д. И. Гәлиа ихьӡ зху  Aԥсны анаукақәа Ракадемиа иатәу Аԥсуаҭҵааратә Институт анаукатә усзуҩ еиҳабыс дыҟан. Уи лкалам иҵыҵит 35 инареиҳаны аҭҵааратә усумҭақәа. Екатерина Шьаҟрыл лнаукатә интерессқәа акыр инарҭбаан, лара ахшыҩзышьҭра ду алҭон аԥсуа бызшәа аморфологиа, асинтаксис, алексикологиа, алексикографиа. Лара дравторуп, ацавторс дыҟоуп афундаменталтә усумҭақәа жәпаки арҵагатә хархәагақәеи: «Аԥсуа бызшәа аграмматика. Афонетикеи аграмматикеи» (Грамматика абхазского языка. Фонетика и морфология») (1968ш.); «Аԥсуа бызшәа аграмматика. Афонетикеи аморфологиеи» (1968 ш.); «Аԥсуа бызшәа азы аматериалқәа реизга» (Сборник материалов по абхазскому языку») (1976ш.); «Аурыс-аԥсуа ажәар» (Русско-абхазский словарь») (1964ш.); «Аурыс-аԥсуа ауаажәларра-политикатә терминологиатә жәар» (Русско-абхазский общественно-политический терминологический словарь» (1991 ш.); «Аурыс-аԥсуа терминологиатә жәар» («Русско-абхазский терминологический словарь» (2000 ш).

Екатерина Шьаҟрыл зеиӷьаҟам аиҭагаҩ иаҳасабала деицырдыруеит – лара аԥсшәахь еиҭалгеит «А.М.Горки  иҩымҭа «Ауаҩы иира» («Рождение человека»), Н. А. Островски ироман «Рожденные бурей» ацыԥҵәаха «Героизм Птахи», иара убас еицырдыруа афранцыз шәҟәыҩҩы  Анри Барбиус иочерк «Среди красот земного рая». Иарбоу аиҭагақәа рҟынтәи раԥхьатәи ҩба аԥсуа школқәа рҵаратә программақәа ирылагалан.

Хра злоу анаука-рҵаҩратә усура азы Е. П. Шьаҟрыл иланаршьахьан Аԥсны Иреиҳаӡоу Асовет аҳаҭыртә шәҟәқәа, «Иреиҳаӡоу ашкол зҽаԥсазтәыз аусзуҩ» ҳәа ахьыӡ ҳаракы аиура лҽаԥсалтәит (1985 ш.).

Е.П. Шьаҟрыл лыԥсҭазаара зегьы аԥсуа жәлар ринтерессқәа рыхьчара иазкын. Аԥсуа жәлар рзы иуадаҩӡаз аамҭақәа рзы, 1952 шықәсазы аԥсуа школқәа анадыркуаз, ахатәы бызшәала ацәажәара азин аныҟамыз, усҟан аспирантураҿы аҵара зҵоз Екатерина Платон-иԥҳаи Ҭамара Платон-иԥҳаи Сталин иахь аԥсуа жәлар рзинқәа рырмаҷра шыҟоу атәы зҳәоз ашәҟәы рҩит. Сталин иԥсра ашьҭахь Москва ари ашәҟәы ала анапхгаратә комиссиа аԥҵан, жәашықәсала имҩаԥысуаз аԥсуаҿагыларатә политика ахыбгалара апроцесс иахыҵхырҭаны иҟалеит.

Аԥсуаҭҵаара аҿиара ахь хәызмаӡам ллагала анаҩсгьы Екатерина Платон-иԥҳа Шьаҟрыл абжьаратәи ашколқәеи егьырҭ аҵараиурҭақәеи рзы аԥсуа бызшәа арҵаҩцәеи аҭҵааҩцәеи рабиԥарақәа реиҵааӡареи рааӡареи аҿы ароль ду налыгӡеит.   

Е. П. Шьаҟрыл иуадаҩӡаз ашықәсқәа рзы аҭоурыхтә иашара аиҭашьақәыргыларазы иӷәӷәоу ашьаҭа зкыз аԥсуа интеллигенциа иналукааша ахаҭарнакцәа дреиуан. Ҳара ҳажәлар наунагӡа ирхашҭраны иҟаӡам уи иҳараку лпатриотизми хеигӡара ҟамҵакәа Аԥсны аҵарадырреи анаукеи рзы иналыгӡаз лусура.