Ахыркәшаратә лекциақәа рҿы астудентцәа жәларбжьаратәи аизыҟазаашьақәа, урҭ ихадоу аҷыдарақәеи иҟарҵо анырреи аазырԥшуа еиуеиԥшым асистемақәа ҭырҵаауан. Ҷыдала ахшыҩзышьҭра аҭан жәларбжьаратәи ашәарҭадара аконцепциа, уи адгылара аҭара иазырхоу астратегиақәа уахь иналаҵаны.
Академиатә ҽазыҟаҵарақәа рнаҩс, ААУ астудентцәеи арҵаҩцәеи Сҭампыл иҟоу Аԥснытәи акультуратә Центр аҿы аԥсуа диаспора ахаҭарнакцәа рԥыларазы иуникалу алшара роуит. Аиԥылара рхы аладырхәит Ҭырқәтәылатәи Ареспублика аҿы аҷыдалкаатә зинмчы змоу Аԥсны ахаҭарнак Ибрагим Аҩӡба, ахаҭарнак иабжьгаҩцәа Кавказ Атрышбеи Џьансыхә Лазбеи. Ари Ацентр атәым дгьыл аҿы аԥсуа культура алашарбага ҳасабла Аԥсны ибеиоу атрадициақәеи аҭынхеи аазырԥшуа ауп. Астудентцәа аҳәаанырцә инхо рџьынџьуаа ирыҿцәажәеит, ргәаанагарақәа еибырҳәеит. Аиԥылара аԥхарра аҵаны, аиҩызаратә ҟазшьа аманы имҩаԥысит. Аҵыхәтәаны, традицала ишышьақәгылахьоу еиԥш, кавказтәи акәашарақәа еицынарыгӡеит.
