Аҟәа. Жьҭаарамза 17, 2024 шықәса. Аԥсныпресс. Аԥснытәи аделегациа Уфа ақалақь аҿы имҩаԥысуа XII Жәларбжьаратәи афорум «Россия – спортивная держава» ахы аланархәуеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы апресс-маҵзура.
Аделегациа аилазаараҿы иҟоуп Аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, Аԥсны аҩныҵҟатәи аусқәа Рминистрра иатәу Ирласны анырра аҟаҵаразы иҷыдоу аотриад акомандаҟаҵаҩ Дадын Чачхалиа, Аҳәынҭеилакы аиҿкааратә зҵаарақәеи аинформациеи рзы аспециалист хада Алиса Инаԥшьба.
Жьҭаарамза 16 рзы Аԥснытәи аделегациа аҿар Рыҩны аҿы Ареспублика Башкорҭосҭан аҿар русқәеи аҿартә политикеи рзы Аҳәынҭқарратә Еилакы ахантәаҩы Вито Сабиров иԥылеит.
Аганқәа агәҭакқәа рзы апкаанҵа рнапы аҵарҩит. Уи иарбахеит актуалра злоу азҵаарақәеи аҳәынҭқарратә аҿартә политикеи аволонтиортә усуреи аҵара-методикатә проектқәеи аҵарадырратә программақәеи аус рыдулара, аконференциақәа, аҵара-методикатә семинарқәа рымҩаԥгара, уҳәа ирызку аинформациатә материалқәа рыла аимадара, аиҿкаарақәа рхаҭарнакцәа аганқәа имҩаԥырго апроектқәа рылахәхара.
Анаҩс аԥснытәи аделегациа Уфа ақалақь аҿар русқәа рзы Акомитет ахантәаҩы Роман Иангурови Уфа ақалақьтә округ Ахадара ахада ихаҭыԥуаҩ Гуллиариа Иалчикаевеи ирыцны Уфа ақалақь аҭоурыхтә Центр аҿы иҟоу аҿартә ҵакыра «Арт-квадрат» иаҭааит. Ари ҳаамҭа иақәшәо, аплошьадка рацәа змоу ақалақьтә ҵакыра ауп.
Иара убри аҽны Аԥснытәи аделегациа азы аилыркаагатә ақалақь ахь аекскурсиа мҩаԥган. Уи хыркәшахеит Аҟәа ақалақь аҿы игылоу аколоннада еиԥшны Уфа ақалақь, аӡиас Белаиа аԥшаҳәаҿы идыргылаз аколоннада аҿаԥхьа. Есыхәылбыҽха аколлонада Ареспублика Аԥсны абираҟ аԥшшәгьы уахь иналаҵаны, Жәларбжьаратәи афорум «Россия – спортивная держава» атәылақәа-алахәылацәа рбираҟқәа рыԥшшәқәа рыла алашара ақәырԥхахоит, аамҭа ала атәыла-алахәылацәа агимнқәагьы дырҳәалоит.
Афорум «Россия - спортивная держава» мҩаԥысуеит Уфа ақалақь аҿы, жьҭаарамза 17 -19 рзы. Афорум аплошьадка хаданы иҟалоит аиқәԥара Ахан. Хымш рыҩныҵҟа арегион аҳҭнықалақь аа-плошьадак рҿы 40 инареиҳаны аусмҩаԥгатәқәа мҩаԥгахоит. Урҭ иреиуоуп – аспорттә еицлабрақәа, инарҭбаау акультуратә программа, аусутә сессиа, Ахада иҟны иҟоу абаҩарҵәыратә культуреи аспорти рыҿиаразы Ахеилак аилатәара.
