««Аҟәа-Амарафон» амҩаԥгара – ари акыр зҵазкуа хҭысуп Аԥсны азы. Ҳара амассатә спорт аҿиара амилаҭ ргәабзиара арӷәӷәара аҿы ихадоу фактор аҳасабала ҳахәаԥшуеит. Ас еиԥш аԥшьгарақәа адгылара рыҭо, ҳара ҳтәыла аԥеиԥш ахь, дарбанызаалак атәылауаҩ еизҳазыӷьара, игәабзиара азы  хра злоу алагала ҟаҳҵоит. Агәра ганы ҳаҟоуп, «Аҟәа-Амарафон» аспорт ауаа шеиднакыло ҳзырбо, зеиӷьаҟам ҳтәыла аҿиара ишацхраауа шьақәзырӷәӷәо акакәны ишыҟоу», – ҳәа иазгәарҭоит ари аусмҩаԥгатә аиҿкааҩцәа.

Урыстәылатәи абренд «Деспорт» аиԥхныҩлара алахәылацәа амарафон зегьы иалагӡаны ирыцзаауеит.

«Агипермаркет ари аусмҩаԥгатә алахәхара – ауаа реидкылара, урҭ рпотенциал аартра аҿы аспорт амч азхаҵара иазырхоу аилазаара афилософиа аанарԥшуеит. «Деспорт» амассатә спорт адгылара аҭара адагьы уи дарбанызаалак ауаҩы иԥсҭазаара иузаҟәымҭхо хәҭаны аҟаҵара азы аҽазышәарақәа ҟанаҵоит. Ари амиссиа аилазаара анагӡара мҩаԥнагоит ахатә дәқьанқәа рҿы  хкы рацәала еилоу аспорттә тауарқәа рыдгаларала, аилазаара ахатә тауартә дырга змоу атауарқәагьы уахь иналаҵаны.  Ас еиԥш аус азнеишьа аспорт ала аҽазыҟаҵара еиҳа иманшәаланы, аинтерес аҵаны иҟанаҵоит», – ҳәа иазгәарҭеит «Деспорт» аҿы.

13 шықәса зхымҵӡац ахәыҷқәа рзы ҷыдала еиҿкаауп ахәыҷтәы еиԥхныҩлара.

Ахәыҷтәы еиԥхныҩлара мҩаԥгахоит жьҭаарамза 26 рзы: 6 шықәса зхымҵӡац атлетцәа 500 метра рҟынӡа инаӡо адистанциа аҿы еицлабуеит, 6 -13 шықәса зхыҵуа –  1 км. рҟынӡа инаӡо адистанциа аҿы.

Аиҳабацәа жьҭаарамза 27 рзы ирзыԥшуп  аиԥхныҩларақәа 3: доусы еиҳа имч зықәхо, изыманшәалоу адистациа алихырц азы 42,2 км, 21,1 км, 5 км иҟоу адистанциақәа рҿы.

Амарафон амҩаԥгараан жьҭаарамза 25 - 27 рзы Аҟәа ақалақь аҿы егьырҭ аусмҩаԥгатәқәагьы мҩаԥысуеит. Убас:

Жьҭаарамза 26, асааҭ 10:00 инаркны асааҭ 19:00 рҟынӡа –  агастрономиатә фестивали амузыкатә фестивали;

Жьҭаарамза 27 рзы,  асааҭ 10:00 инаркны асааҭ 19:00 рҟынӡа  – амузыкатәии аҩытә фестивали.