Аҟәа. Жьҭаарамза 10, 2024 шықәса. Аԥсныпресс. Аԥсны аҩныҵҟатәи аусқәа рминистр Роберт Киут аусуратә визитла Ҟарачы-Черқьессиатәи Ареспублика ахь днеит, ҳәа адырра ҟанаҵоит аҩныҵҟатәи аусқәа Рминистрра апресс-маҵзура.
Иара Аԥсни Урыстәылеи аҳәаа иаԥну аҵакырақәа рҿы аусеицура акоординациеи аиқәыршаҳаҭреи рзы Аԥсни Урыстәылеи рыҩныҵҟатәи аусқәа Рминистррақәа аҳәаа иаԥну араионқәа рыҩныҵҟатәи аусқәа русбарҭақәа акомитетқәа реилатәара ихы алаирхәуеит.
«Ас еиԥш иҟоу, ҳзышьцылахьоу аусеицура аформат, хадара злоу аусеицура ахырхарҭақәа рыла ҳхылаԥшырҭақәа рпозициақәа еиҳа еиӷьны аилкаара алнаршоит», – ҳәа жьҭаарамза 11 рзы зымҩаԥгара азԥхьагәаҭоу аиԥылара азы иҳәеит Роберт Киут.
Аԥснытәи аделегациа аилазаараҿы иҟоуп: аҩныҵҟатәи аусқәа рминистр ихаҭыԥуаҩ Беслан Ҷкадуеи аҩныҵҟатәи аусқәа Рминистрра апрофильтә усбарҭақәа рнапхгаҩцәа.
