Анаҩс уи Ради Хабиров иҭабуп ҳәа еиҳәеит аҟәатәи аколоннада иахҩылааны Уфа иргылоу аклоннадазы:
«Шәара Аԥсны ҩыза дуны шәыршьоит, ҳаҭыр ду шәықәуп. Иахьа иааҳартуа аргыламҭа Уфа иҟоу иреиӷьу аҭыԥ ҷыдақәа ируакны, ақалақьуааи иаҭаауа асасцәеи аҳҭнықалақь аҩныҵҟа бзиа ирбо ҭыԥны ишыҟало».
Иқәгылара хыркәшо, А. Бжьаниа иацҵаны иҳәеит:
«Акыр иаԥсоу аҩызцәа, ишәыдысныҳәалоит Башкорҭосҭан Ареспублика амш! Аҭынчра, аизҳазыӷьара ыҟазааит есқьынгьы!»
Башкорҭосҭан Ахада Ради Хабиров ареспублика ауааԥсыра аколоннада аартра инамаданы дрыдныҳәало Аԥсни Башкорҭосҭани ирыбжьоу аиҩызаратә еизыҟазаашьақәа аринахысгьы хра злоу аҿиара шаиуо азы агәыӷра ааирԥшит.
Ради Хабиров ҩ-республикак рыбжьара аимадарақәа реиқәырхареи рырӷәӷәареи ирымоу аҵак ду азгәаҭо, иҳәеит:
«Ҳажәларқәа ирыбжьоу аимадара адацқәа ҵаулоуп. Иҳаҩсыз ашәышықәса иуадаҩыз аҩажәатәи ашықәсқәа раан амлакра аныҟаз, Аԥсны Поволжие ацхыраара анаҭеит. Аԥсны ахақәиҭреи ахьыԥшымреи рзы ианықәԥоз, Башкорҭосҭан активла рхы аладырхәит. 1994 ш. рзы Башкорҭосҭан ауп раԥхьа ахаҭарнакра аазыртыз Аԥсны. Ҳарҭ ахаан иаҳхашҭӡом урҭ ахҭысқәа. Иахьа, Аԥсны аҿиарамҩа иануп, сара исҭахуп абри аколоннада ҳаиҩызареи ҳаҭыреиқәҵареи ирсимволны иҟаларц, аҭаацәарақәа ҳзеиԥш ҭоурых ахьыргәаладыршәо ҭыԥны иҟаларц, аԥеиԥш бзиа ҳамазарц».
