Дрылахәын  Аԥсуа ар Шроматәи (абҵарамза, 1992 ш.), Ииультәи (1993 ш.), Сентиабртәи (1993 ш.) ажәыларақәа, Аҟәа ақалақь Қырҭтәыла Аҳәынҭсовет архәҭақәа рҟынтәи ахақәиҭтәразы ажәыларатә операциа акоординаторс дыҟан.

Аҳҭнықалақь ахақәиҭтәра ашьҭахь Гиви Камыгә-иԥа аус иуан Аҟәатәи агарнизон аиҳабыс, нас – Аҩнуҵҟатәи аусқәа рминистрс (1993 – 1996), 1996–2002 шықәсқәа рзы Атәылахьчара аминистр актәи ихаҭыԥуаҩыс, Аԥсны Арбџьармчқәа Рыштаб Хада аиҳабыс дыҟан. 2002–2004 шықәсқәа рзы Аԥсны Ашәарҭадаратә маҵзура ахантәаҩыс, Гәдоуҭатәи агарнизон аиҳабыс дыҟан.

1996 шықәсазы иара ианашьан аинрал-маиор ҳәа арратә хьӡы, 1998 шықәсазы – аинрал-леитенант.

1998 шықәсазы напхгара аиҭон Гал араион аҿы ақырҭуа бџьарла еибыҭаз адиверсиатә еиҿкаарақәа рықәгара иазкны имҩаԥгаз маитәи аоперациа.

Жьҭаарамза, 2001 шықәса рзы Кәыдрытәи аҩхаа аладатәи ахәҭа аҿы имҩаԥгаз атеррористҿагыларатә операциа анапхгаҩцәа дреиуан.  2003 шықәса, мшаԥымзазы Аԥсны Аҳәынҭқарратә шәарҭадара Амаҵзура ахантәаҩыс дҟалаанӡа арратә зҵаарақәа рзы Аҳәынҭқарра Ахада иабжьгаҩыс дыҟан.

Гиви Камыгә-иԥа аԥсуа-қырҭуатә еиҿцәажәарақәа активла ихы алаирхәан, Еиду Амилаҭқәа Реиҿкаара ахылаԥшрала Акоординациатә Хеилак аҿы ашәарҭадара азҵаарақәа рзы актәи аусуратә гәыԥ анапхгаҩыс дыҟан. Женева, Афины, Сҭампыл имҩаԥгаз аофициалтә еиԥыларақәа дрылахәын.

Аԥсны жәлар Рџьынџьтәылатәи еибашьра аҿы иааирԥшыз агәымшәареи афырхаҵареи рзы Гиви Камыгә-иԥа «Аԥсны Афырхаҵа» ҳәа ахьӡ ихҵан. Иара убас уи ианашьахеит аорден «Ахьӡ-Аԥша аорден II аҩаӡара, «Ԥырашәа змам аусуразы» амедалқәа I, II, III аҩаӡарақәа, «Кәыдрытәи аҩхаа ахақәиҭтәра азы», «Аибашьратә еиҩызара азы», «Аԥсны абжьаҟазаратә миссиа 10 шықәса ахыҵра», «Нхыҵ Кавказ арратә маҵзура ахысра азы», «Аԥсадгьыл гәакала азыҟазаара азы», «Қырҭтәыла аҭынчрахь адцалара», уҳәа убас иҵегьы.

Гиви Камыгә-иԥа Агрба иԥсҭазаара далҵит нанҳәа 27, 2014 шықәса рзы.