Нижни Новгород Ахада Иури Шалабаев ахәҭакахьала Аслан Бжьаниа адкылара бзиа азы иҭабуп ҳәа еиҳәеит.  Иури Шалабаев иазгәеиҭеит Аԥсни дареи еицырзыфеидоу аусеицура дшазҿлымҳау.

«Ҳара ҳделегациа уажәаԥхьагьы Аҟәаҟа иаахьеит. Аҟәеи Нижни Новгороди реизыҟазаашьақәа абар шьҭа 13 шықәса ирхысуеит. Ҳара аусеицура ҳабжьоуп еиуеиԥшым ахырхарҭақәа рыла. Иахьа даҽа хықәкыкгьы анагӡара алыршахеит – ҳакалақьқәа аиашьаратә еизыҟазаашьақәа рыбжьарҵоит. Иахьа ҳара аиашьаратә еизыҟазаашьақәа рыбжьаҵара азы Аиқәшаҳаҭра ҳнапы аҵаҳаҩуеит. Уи иарбоуп 2025 шықәсазы иазԥхьагәаҭоу аусмҩаԥгатәқәа рыплан. Уи  60 инарзынаԥшуа апунктқәа арбоуп. Зынагӡара ҳгәы иҭоу апроект дуқәа ҳамоуп, урҭ иреиуоуп жәларбжьаратәи  апатриоттә ааӡара ацентри арра-патриоттә ааӡара алагери раԥҵара.  Нижни Новгород Аԥсны аус ацуреи аиамбзиаратә еизыҟазаашьақәа рырҿиареи иазхиоуп», – ҳәа иҳәеит иара.

Аҟәа ақалақь ахада Беслан Ешба Аԥсны аҳҭнықалақьи Нижни Новгороди аҩганк еицырзыфеидоу еиуеиԥшым ахырхарҭақәа рыла аусеицура арҿиара иазыхиоуп ҳәа иазгәеиҭеит.

«Ҳара ԥхьаҟатәи хра злоу агәҭакқәа ҳамоуп. Убри аҟнытә гәахәара дула иҳадаҳкылоит шәара иахьа араҟа шәыҟазаара. Ҳара ҳазыразуп ҳақалақьқәа рыбжьара аиашьаратә еизыҟазаашьақәа рышьақәыргылара», - ҳәа иҳәеит Беслан Ешба.

Аиԥылара ахыркәшамҭаз аганқәа агәаларшәагатә ҳамҭақәа еимырдеит.

Анаҩс, Аслан Бжьаниа Аҟәеи Нижни Новгороди аиашьара рыбжьаҵаразы Аиқәшаҳаҭра анапаҵаҩра иазкыз аусмҩаԥгатә далахәын.