Аҟәа. Цәыббрамза 24, 2024 шықәса. Аԥсныпресс. Аҳәынҭқарра Ахада Аслан Бжьаниа азинхьчаратә усбарҭақәа 2020-2024 шш. инарыгӡаз аусуразы аҳасабырба идикылеит.
Убас, аҳасабырбатә аамҭахәҭа иалагӡаны ашәҟәы иҭагалахеит 3 229 цәгьоура, уи 2015 – 2019 шш. (4507) иаҿырԥшны уахәаԥшуазар, 1278 цәгьоура рыла еиҵоуп. Аҵыхәтәантәи 5 шықәса рыҩныҵҟа Аԥсны ацәгьоурақәа рхыԥьаӡара иагхеит.
Иазгәаҭоуп, ихацыркыз ашьаусеилыргарақәа рхыԥхьаӡара агхара. 2020 шықәса инаркны 2024 шықәса 1-тәи азыбжа аҟынӡа ашәҟәы иҭагалахеит 1539 аӷьычра иадҳәалоу афактқәа, уи 2015 - 2019 шш. (1539/572). ирҭагӡоу аамҭахәҭазы иҟалаз раасҭа 967 рыла еиҵоуп. Арҳәрақәа 130 рыла еиҵахеит (173/43 иашьашәаланы), ақәыларақәа – 115 рыла еиҵахеит (150/35), ауаа рԥаара – 13 хҭыс рыла еиҵахеит (20/7).
2020 шықәса инаркны 2024 шықәса актәи азыбжа аҟынӡа азинхьчаратә усбарҭақәа рыла акоррупциатә хырхарҭа змоу ацәгьоурақәа рцәыргареи, ргәырҽынҵареи, раарԥшреи рзы имҩаԥгаз аоператив-ԥшааратә усура иалҵшәаны иаарԥшын иҳаҩсыз ашықәсқәа рзы иҟалаз ацәгьоурақәагьы уахь иналаҵаны 2841 цәгьоура, уи процентла иааугозар 88% рҟынӡа инаӡоит (урҭ рахьынтә 568 цәгьоура иҳаҩсыз ашықәсқәа рзы иҟалаз роуп). Ауаҩшьрақәа, ауаа рԥаара, ақәыларақәа, арҳәрақәа реиԥш иҟоу ацәгьоурақәа раарԥшра иҳараку аҩаӡараҿы иаанхоит, уи 70% рҟынӡа инаӡоит. Уаанӡа еиԥш уажәгьы, азинеиҿкаара аусбарҭақәа рҿы еиҳа изызҿлымҳау зҵаарақәаны иҟоуп изакәанымкәа анаркотикатә маҭәашьарқәа реикәыршареи амҩақәа рҿы амҩа-транспорттә машәыртә хҭысқәа рыррацәареи.
Изакәанымкәа анаркотикатә маҭәашьарқәа реикәыршара афактқәа рыла Аԥсны иахьаҵанакуа 2020 шықәса инаркны 2024 шықәса актәи азыбжа аҟынӡа ихацыркын 860 шьаус, урҭ рахьынтә анаҩс аҭира хықәкыс ирыманы анаркотикатә маҭәашьар рыдбалара азы – 127 шьаус. 2015 – 2019 шш. ирҭагӡоу аамҭахәҭа азы урҭ рхыԥхьаӡара 46 рҟынӡа инаӡон, уи Аԥсны аҩныҵҟатәи аусқәа Рминистрра иатәу анаркотикқәа реикәыршара ахылаԥшреи аҿагылареи рзы Аусбарҭа аусура хра злоу алҵшәақәа шыҟоу арҵабыргуеит. Иара убас, аҳасабырбатә аамҭахәҭа азы Аԥсны иахьаҵанакуа анаркотикатә маҭәашьарқәа рыларҵәара иаҿыз еиҿкаау ацәгьоуратә гәыԥқәа хәба аарԥшын.
2020 шықәса инаркны 2024 шықәса актәи азыбжанӡа аҭыԥ рыман 850 амҩа-транспорттә машәыртә хҭысқәа, урҭ ирыхҟьаны 240-ҩык ҭахеит. 293 амҩа-транспорттә машәыртә хҭыс рыла ашьауҭҵаарақәа хыцыркуп.
2015 - 2019 шш. рзы ашәҟәы иҭагалан 972 амҩа-транспорттә машәыртә хҭыс, урҭ ирыхҟьаны 342-ҩык ҭахеит. Ихацыркын 282 шьаусҭҵаара. Иарбоу арбагақәа иаадырԥшуеит амҩа-транспорттә машәыртә хҭысқәа рхыԥхьаӡара 122 рыла ишеиҵахаз, иҭахаз рхыԥхьаӡара акәзар – 102-ҩык рыла.
Амҩа-транспорттә машәыртә хҭысқәа рыҟалара аиҳарак изыхҟьо уаанӡа еиԥш уажәгьы атранспорттә хархәага ижәны аԥсҟы акра, ишьақәыргылоу аццакра аԥкра ахысра, аԥысреи аманиоврҟаҵареи (амашьына ахырхарҭа аԥсахра) аԥҟарақәа реилагара.
