Аҟәа. Цәыббрамза 19, 2024 шықәса. Аԥсныпресс. Цәыббра 19, 2024 шықәса рзы «Аԥсны Аҳәынҭқарреи Аахыҵ Уаԥстәыла Ареспубликеи рыбжьара аиҩызареи аусеицуреи рзы Аиқәшаҳаҭра» анапы аҵаҩуижьҭеи 19 шықәса ҵит.
«Аԥсни Аахыҵ Уаԥстәылеи реизыҟазаашьақәа – ари раԥхьа иргыланы ахақәиҭреи ахьыԥшымреи ирзықәԥоз, ауадаҩрақәа зхызгаз, Қырҭтәыла ихнартыз аибашьра иалҵыз аиашьаратә жәларқәа реизыҟазаашьоуп. Ақырҭуа агрессор Аԥсни Аахыҵ Уаԥстәылеи рыжәларқәа дыриааирц иҽшазишәазгьы дара ирылшеит уи ииааира.
Аиқәшаҳаҭра ишьақәнарӷәӷәеит ҳажәларқәа рыбжьара аиашьареи аиҩызареи рыҟазаара, иаанартит аусеицураз амҩа ҿыцқәа. Иара убри аан иазгәанаҭеит еснагь аицхыраара иазыхиоу ҳтәылақәа рыҩба рыбжьара аҭоурых ду зманы иҟоу аизыҟазаашьақәа», – ҳәа иаҳәоит Аԥсны Аҳәынҭқарра адәныҟатәи аусқәа Рминистрра иҟанаҵаз аҳәаҭа аҿы.
