Ауаажәларратә Палата атәыла амчратә структурақәа рнапхгара ахь ари арезонанстә ҟазшьа змоу ацәгьоура излауа ала аамҭа кьаҿ иалагӡаны аобиективла аилыргара алдыршарц, насгьы уи алҵшәақәа рзы адыррақәа иаартны  алаҳәара аиурц азы ааԥхьара ҟанаҵоит. «Ҳара убасҵәҟьа  аполитикатә партиақәа, ауаажәларратә еиҿкаарақәа, иара убас амассатә информациа ахархәагақәа рахь амчратә структурақәа рыла аусеилыргара хырәшахаанӡа, изеиԥшразаалак ахара адҵара, мамзаргьы ишьақәырӷәӷәам алкаақәа рыҟаҵара мап ацәыркырц азы ааԥхьара ҟаҳҵоит. Ауаажәларра рыҩныҵҟа еиуеиԥшым аверсиақәа ирылацәажәоит, иарбоу ахҭыс аполитикатә ҵакыҵәах аарԥшрагьы уахь иналаҵаны.  Амассатә информациа ахархәагақәа рхаҭарнакцәеи егьырҭ агәаанагарақәа ирықәымшәо зхатә позициа аартны изҳәо атәылауааи рганахьала изеиԥшразаалак амчхара аарԥшра ҟалашьа аманы иаабом.  Ҳара ажәа ахақәиҭра азакәан ала ахьчара ахьыҟоу адемократиатә, азинтә ҳәынҭқарра аҿы ҳанхоит. Иаҳхамышҭып уи», - ҳәа иазгәаҭоуп Ауаажәларратә Палата амаӡаныҟәгаҩ Гәыли Кьычба лнапы зҵалҩыз аҳәамҭа аҿы.