Аиԥылара иалахәыз актуалра злоу апроблемақәак ирзааҭгылеит, урҭ рхыԥхьаӡараҿы иҟоуп аекономикатә ҿиара, аҵарадырра, акультура, адемографиа, уҳәа ирыдҳәалоу азҵаарақәа. Иара убас Аԥсны аекономика аҿы арегионалтә дисбаланс аҟазаара атәгьы азгәаҭан.

Абесалом Кәарҷиа аиҭакрақәа ирыҵоу аҵакы атәы дазааҭгыло, Аԥсны анҭыҵынтәи имцырку аҵакдуқәа адгалара, ареспублика азы изеиԥшразаалак аиҭакрақәа ашәарҭара рыҵоуп ҳәа агәаанагарақәа ауаажәларра рыларҵәара мҩаԥысуеит ҳәа инаҵшьны иазгәеиҭеит.   Убри иахҟьаны еиҳа ихшыҩырку апроетқәагьы аиҳара аидеиа аҳасабала, мамзаргьы аполитикатә еиҿагылара аргуметнтқәа раҳасабала иаанхоит. Ас еиԥш иҟоу атенденциақәа Аԥсны азы ашәарҭара рыҵоуп.  

Абесалом Кәарҷиеи амассатә информациа ахархәагақәа рхаҭарнакцәеи «атәыла азы зегьы реиҳа ихадоу, зегьы реиҳа зҵакы дуу аресурсны иҟоу – ауаа роуп, убри инамаданы ҳара ҳхықәкы хаданы иҟоуп урҭ рпотенциал арҿиара азы иманшәалоу аҭагылазаашьақәа раԥҵара» ҳәа агәаанагара аҿы еиқәшаҳаҭхеит.

Абри азы адырра ҟанаҵоит Аҳәынҭқарра Ахада иҟны иҟоу Аинформациатә Центр.