Аҟәа. Цәыббрамза 12, 2024 шықәса. Аԥсныпресс. Аԥсны иҟоу Урыстәыла аус ацура Ахаҭарнакра анапхгаҩы Владислав Куликов Гал ақалақь Ахадара акультура аҟәша аҟны иҟоу аестрада-фольклортә ансамбль «Мырзаҟан» аколлектив дырԥылеит.
Ансамбль «Мырзаҟан» аколлектив цәыббрамза 6 – 7 рзы Риазань ақалақь аҿы иҩаԥысуаз VII ажәытәӡатәи ақалақьқәа Жәларбжьаратәи рфорум «Адунеи ажәытәӡатәи ақалақьқәа реимадареи акультуратә ҭынхеи» («Культурное наследие и взаимодействие древних городов мира») иалахәын.
Аколлектив алахәылацәа Владислав Куликов афорум алахәхара аҟынтәи ироуз ацәаныррақәа ртәы изеиҭарҳәеит.
Ансамбль иарбоу афорум алахәхара Аԥсны иҟоу Урыстәыла аус ацура Ахаҭарнакра иабзоурахеит.
Аиԥылара ахыркәшамҭаз Ахаҭарнакра аиҳабы аколлектив алахәылацәа ашәҟәқәа ҳамҭас ириҭеит, иара убас Галтәи агуманитартә колеџь азы асахьаркыратә литература ааигеит.
