Аҟәа. Цәыббрамза 1, 2024 шықәса. Аԥсныпресс. Ҭырқәтәыла, Сҭампыл ақалақь аҿы, цәыббрамза 5 – 19 рзы аԥснытәи асахьаҭхыҩцәа Адамыр Аршба, Асида Аҳәба, Баҭал Џьапуа, Сабина Кәарацхьелиа, Саида Кәыҵниа, Архип Лабахәуа, Аԥшьа Ҳагба, Диана Хьынҭәба, Асҭанда Чамагәуа, Олег Ҷедиа русумҭақәа рцәыргақәҵа мҩаԥыслоит. Абри азы адырра ҟанаҵоит Аԥсны акультура Аминистрра апресс-маҵзура.
«Сҭампыл ақалақь агәаны, агалереиа Барын Хан аҿы, цәыббрамза 5 рзы иаатуеит аԥснытәи асахьаҭыхыҩцәа русумҭақәа рцәыргақәҵа. Ацәыргақәҵа агалереиа AUADA алархәны еиҿкаахеит. Уи ахаҭарнакра сареи Аԥшьа Ҳагбеи инаҳагӡоит.
Асахьаҭыхыҩцәеи Ҭырқәтәыла иқәынхо аԥсуа-адыга жәлар рдиаспора ахаҭарнакцәа Д. Хуважи С. Ергиуни ҳара иҳадыргалеит Сҭампыл ақалақь аҿы, ажьырныҳәамза 21, 2024 шықәса рзы иҟалаз атрагедиатә хҭыс, Аԥсны Амилаҭтә сахьатә галереиа маҷӡак ада зегьы ахьалаблыз абылра иазкны ацәыргақәҵа амҩаԥгара.
Аԥсны зегьы ари атрагедиа даараӡа ҳгәы ҳнархьит, ҳхьаа ҳацеиҩыршеит Ҭырқәтәылантәи ҳҩызцәеи ҳколлегацәеи. Убас иит ажьырныҳәамза 21 азы иҟалаз атрагедиа иазкны ацәыргақәҵа амҩаԥгара азы аидеиа.
10-ҩык аԥснытәи асахьаҭыхыҩцәа ацәыргақәҵа аҿы усумҭак-усумҭак цәырыргоит – аинсталлиациақәа, аҿыханҵатә усумҭақәа, амҿы иалху аусумҭақәа, акьанџьақәа, аколлажқәа», – ҳәа еиҭалҳәеит асахьаҭыхыҩ Диана Хьыҭәба.
Лара ари ацәыргақәҵа амҩаԥгара алзыршаз Аԥсны акультура Аминистрра иҟанаҵаз ацхыраара, иара убас акураторцәеи аҩызцәеи рҟынтәи ироуз адгылара азы иҭабуп ҳәа лҳәеит.
