Аҟәа. Нанҳәамза 30, 2024 шықәса. Аԥсныпресс. В. Г. Арӡынба ихьӡ зху Аҳәынҭқарратә Арратә Ахьӡ-Аԥша амузеи аҟны мчымхарала хабарда ибжьадырӡыз ргәалашәара Жәларбжьаратәи Амш иазку ахәылԥаз мҩаԥысит.
Амузеи афоие аҿы еиҿкаахеит 1992-1993 шш. Аԥсны жәлар Рџьынџьтәылатәи еибашьра аҿы хабарда ибжьаӡыз рфотосахьақәа рцәыргақәҵа.
Аиԥылара аартуа, Аиҿкаара «Аԥсны анацәа аҭынчреи асоциалтә иашареи рзы» ахантәаҩы Гәыли Кьычба илҳәеит:
«2010 шықәса инаркны ихацыркын хабарда ибжьаӡыз рыԥшраа иазку аусурақәа. Аха уи аԥхьаҟагьы, аибашьра анеилга иаразнак, Аиҿкаара «Аԥсны анацәа аҭынчреи асоциалтә иашареи рзы» ари азҵаара ахшыҩзышьҭра шаҭаху азы аҳәамҭақәа ҟанаҵон. Ҳара ҳаиҿкаареи Жәларбжьаратәи Аџьар Ҟаԥшь Акомитети аусеицура рыбжьарҵеит. Ари аамҭа иалагӡаны иҟаҵоугьы маҷӡам. Ҳара иҳалшеит аӡәырҩы аҭаацәа ирзааигәоу рыԥсыбаҩ рзырхынҳәра».
Аԥсны адәныҟатәи аусқәа рминстр ихаҭыԥуаҩ Иракли Ҭыжәба 2019 шықәса раахыс Аԥсны адәныҟатәи аусқәа Рминистрра ахылаԥшрала хабарда ибжьаӡыз рыԥшаара азы акомиссиа инанагӡаз аусура атәы еиҭеиҳәеит.
«Аԥсны жәлар Рџьынџьтәылатәи еибашьра ашьҭахь имаҷымкәа иаанхеит зхабар еилкаамыз ауаа. Урҭ хабарда ибжьаӡыз ҳәа иԥхьаӡоуп. Ҳара урҭ рыԥсыбаҩ ахаҭара ашьақәыргылареи анаҩс уи доусы рҭаацәа рыҭареи рзы аусура мҩаԥаагоит».
Иракли Ҭыжәба иажәақәа рыла, иахьатәи амш азы атәыла адәныҟатәи аусқәа Рминистрра, Иҷыдоу аҭагылазаашьақәа рзы Аминистрреи агәабзиарахьчара Аминистрреи рхаҭарнакцәа злаху иҷыдоу аусуратә гәыԥ аԥҵоуп:
«Жәларбжьаратәи Аџьар Ҟаԥшь Акомитети ҳареи аусеицура ҳабжьоуп. Агәыӷра ҳамоуп сынтәа, ҳусеицура иабзоураны, алҵшәа бзиақәа раарԥшра шҳалшо», - ҳәа иҳәеит иара.
Жәларбжьаратәи Аџьар Ҟаԥшь Акомиетет Амиссиа ахада Чынгыз Раиымбеков жәларбжьаратәи агуманитартә еиҿкаареи аԥснытәи аструктурақәеи хра злоу аусеицура шрыбжьоу азгәеиҭеит.
«Ҳара хабарда ибжьаӡыз рзы аинформациа аԥшаара иазку аусура иааиԥмырҟьаӡақәа анагӡара ҳаҿуп. Аҵыхәтәантәи ашықәсқәа рзы ибзиоу алшәақәа раарԥшра ҳалҳаршеит. Аусура иацҵахоит, ҳара иҳалшо зегьы ҟаҳҵалоит изалауа ала еиҳаны ауаа рыуацәа рыԥшаартә еиԥш», - ҳәа иҳәеит иара.
Агәалашәаратә хәылԥазы иалахәыз аибашьраан хабарда ибжьаӡыз ирызкыз афильм дырбахеит.
