Аҟәа. Цәыббрамза 30, 2024 шықәса. Аԥсныпресс. Абар шьҭа жәышықәса инеиԥынкыланы агәыҳалалратә уаажәларратә Еиҿкаара «Кьиараз» аҵарашықәс ҿыц аламҭалазы «Насыԥ зцу цәыббрамза акы» ҳәа хыс измоу акциа мҩаԥнагоит, иара убри ала зматериалтә ҭагылазаашьа уадаҩу аҭаацәарақәа рҟынтәи ашколхәыҷқәа рзы аҵара азы ихымԥадатәиу аканцелиартә маҭәахәқәа раахәараҿы ацхыраара ҟанаҵоит.
Аканцелиартә маҭәахәқәа ркомплектқәа еиуеиԥшым аклассқәа рҿы иҟоу аҭаххрақәа ирыдҳәаланы еиқәыршәахоит. Урҭ семестрк аҟынӡа аҵара иазхароуп.
Акциа шымҩаԥысуа, насгьы уи азы агәазыҳәара змоу цхыраарас иҟарҵар рылшо атәы асоциалтә информациа азы Агентра «Аԥсны» иазеиҭалҳәеит агәаҳалалратә уаажәларратә Еиҿкаара «Кьиараз» аусзуҩ Кристина Лакоиа.
«Кьиараз» иаԥшьнагаз акциа анагӡаразы аиҳарак аинтернет аҿы аԥаратә хархәагақәа реизгара азы алаҳәара ҟанаҵоит, еиуеиԥшым аиҿкаарақәеи анаплакқәеи рахь афинанстә цхыраара иаҳәоит. Анаҩс еизгахо аԥарақәа рыла Урыстәылатәи иаҭаху аканцелиартә тауар ҿаҵахоит. Ҳара шьҭа ашықәсқәа инеиԥынкыланы еилазаарак аҿы аканцелиартә тауарқәа аҿаҳҵоит, убри инамаданы ҳара ҳзы уаҟа имаҷымкәа ахә еиҵартәоит», – ҳәа илҳәеит лара.
Ацхыраара роур алшоит уи зҭаху зегьы, ԥарала адагьы дара рзы ихымԥадатәиу амаҭәахәқәа рылагьы.
«Ацхыраара аҟаҵара зҭаху зегьы Воронов имҩа, аҩны № 64 ала иҟоу ҳофис ахь инаргар рылшоит ашкол азы ихымԥадатәиу амаҭәахәқәа, аканцелиариатә тауарқәа. Арӡынба имҩала игылоу адәқьан «Канцпарк» аҿы ишьақәыргылоуп ашәындәыҟәра, уахь уи азы агәазыҳәареи алшареи змоу дарбанызаалак ҳара ахылаԥшра заҳҭо ахәыҷқәа рзы ашколтә маҭәахәқәа ҭаиҵар ҟалоит», – ҳәа еиҭалҳәеит Кристина Лакоиа.
Есышықәса ацхыраара зҭаху ашколхәыҷқәа рсиа иацлоит. Сынтәа акциа аиҿкааҩцәа иазԥхьагәаҭаны ирымоуп зықьҩык рҟынӡа ахәыҷқәа ацхыраара рыҭара.
«Ари акциа аҿы ҳара ҳҿы ашәҟәы иҭагалоу аҭаацәа рнаҩс, аҳәынҭқарратә Усбарҭа «Атәыла араионқәа зегьы рҟынтәи ахәыҷқәеи аҭаацәеи асоциалтә дгылара рыҭара азы Амаҵзура» аспециалистцәа иҳарҭо асиақәа рҟынтәи ашколхәыҷқәагьы ацхыраара раҳҭоит. Убасҵәҟьа есышықәса ҳара иҳадҵаалоит зматериалтә ҭагылазаашьа уадаҩхаз атәылауаа. Иҟалалоит убас аҭаацәа анычмазаҩхалак, аусура анрылымшалак, зныктәи ацхырааразы иадҳадҵаало. Ас еиԥш иҟоу ахҭысқәа ҳара иҭаҳҵаауеит, иарбоу аҭаацәа аиашазы ацхыраара шырҭаху анышьақәырӷәӷәахалак, ацхыраара рыҭара ҳҽазаҳшәоит», – ҳәа иазгәалҭеит Кристина Лакоиа.
Иаахәахәо аканцелиариатә тауарқәа зегьы акомплектқәа рыла еихшаны ацхыраара зҭаху аҭаацәа ирызшахоит.
Иарбоу акциа амҩаԥгараан агәыҳалалратә уаажәларратә Еиҿкаара «Кьиараз» ацхыраара арҭоит аволонтиорцәа.
«Избан акәзар, аиашазы ас еиԥш зымҽхак ҭбаау аусура анагӡара акыр иуадаҩуп. Лассы-лассы хатәгәаԥхарала аусура ҳәа иаҳзааиуеит «Кьиараз» ахылаԥшра аҵаҟа иҟоугьы», - ҳәа еиҭалҳәеит Кристина Лакоиа.
Акоманда ацлареи ацхыраара аҟаҵареи, уи азы агәазҳәара змоу зегьы ирылшоит.
Агәыҳалалратә уаажәларратә Еиҿкаара «Кьиараз» еиҿнакаауа акциа афинанстә дгылара аҭара зҭаху зегьы аԥарақәа рхыԥхьаӡаларазы иҟоу алшарақәа зегьы ртәы Аиҿкаара Инстаграм @kiarazaa аҿы иҟоу аофициалтә даҟьа https://www.instagram.com/kiarazaa?igsh=aG9xMWx4d2xtN242 ала еилыркаар ҟалоит.
