Аҟәа. Нанҳәамза 30, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа иахьа Ареспублика Башкортосҭан аҟынӡа днаӡеит.
Уфа ақалақь аҳаирбаӷәаза аҿы иара диԥылеит Башкортосҭан Ахада Ради Хабиров.
Аԥсны Аҳәынҭқарра Ахада Уфа ақалақь 450 -шықәса ахыҵра азгәаҭара иазку аныҳәатә усмҩаԥгатәқәа ихы рылаирхәуеит, ҳәа адырра ҟанаҵоит Аҳәынҭқарра Ахада ипресс-маҵзура.
Аусуратә ҭаара аҳәаақәа ирҭагӡаны иазԥхьагәаҭоуп Ареспублика Ахада Ради Хабиров иԥылара, Уфа ақалақь, «Белаиа» аӡиас аԥшаҳәаҿы аԥсуа жәлари башкиртәи ажәлари реиҩызара ахьӡала Агәашьаркыра аргылара ахьымҩаԥысуаз аҭаара, иара убас асоциалтәи акультуратәи ҵакы змоу егьырҭ аобиектқәа жәпакы рҭаара.
