Аҟәа. Нанҳәамза 30, 2024 шықәса. Аԥсныпресс. Нанҳәамза 30 рзы Уфа Ареспублика Аҩны аҟны Аԥсны Аҳәынҭқарра Ахада Аслан Бжьаниеи Башкорҭосҭан Ахада Ради Хабирови реиԥылара мҩаԥысит.
Амшхәаԥштә аҟны иқәгылан жәларбжьаратәи аусеицзуреи азеиԥш проектқәеи рҳәаақәҵара иазкыз азҵаарақәа.
Башкорҭосҭан Ахада иазгәеиҭеит аусеицзура аҿиаразы иҟоу алшарақәа, иҳәеит иааиуа ашықәсқәа рзы уи арҭбааразы амҩатә карта шазырхиахо.
«Ҳусеицзура ахырхарҭа хадақәа ируакуп- атуризм. Иҳаҩсыз ашықәс азы Башкорҭосҭанынтә атәанчаҩцәа рпилоттә гәыԥ «Абашкир-аԥсуа қәранҵыра змоу» апрограммала Аԥсныҟа иааит. Даара агәахәа узҭоз ахҳәаақәа ыҟан. Убри аҟынтә ҳара ҳазыԥшуп Аҟәатәи аҳаиртә баӷәаза аргылара ахыркәшареи, Уфеи Аԥсни ишиашоу ирыбжьоу амҩа аартреи, аҩ-ганкгьы рахь иаауа аԥсшьаҩцәа рхыԥхьаӡара аизырҳаразы, - иҳәеит арегион анапхгаҩы Ради Хабиров. – «Аҽарҭбаауеит иҳабжьоу ахәаахәҭра. Аԥсуа ҩқәеи ашәырқәеи рыҭира еизҳауеит. Аԥсуа џьармыкьаҿы қәҿиарала аус руеит башкириатәи анаплакқәа. Урҭ ажәлар рҭахрақәа ирықәшәо атауарқәа рыла еиқәдыршәоит. Иара убас алшара бзиақәа ыҟоуп акәац аалыҵқәа, аҵиаатә, асирыӷхәшақәа, араԥс, ашьақар, абиопрепаратқәа, арҵәыгақәа уҳәа Аԥсныҟа раагаразы».
Аслан Бжьаниа хаҭала иара ихьӡалеи Аԥсны жәлар рыхьӡалеи Башкортостан ажәлар Уфа 450-шықәса ахыҵра азы адныҳәалара ҟаҵеит, наҟ-ааҟтәи аԥшьгарақәа рҳәаақәа рырҭбаара дшазҿламҳау азгәеиҭеит.
«Аԥсни Урыстәылеи ирыбжьоу аизыҟазаашьақәа аидгыларатә ҟазшьа рымоуп, Урыстәылатәи Афедерациа арегионқәеи ҳареи ҳаимадара арӷәӷәара - зегь раԥхьа игылоу усуп. Башкорҭосҭани ҳареи акрааҵуеит аиҩызара ҳабжьоижьҭеи». – Иахьа ҳара ҳделегациа Уфа Аситуациатә центр иаҭааит, атехнологиа аганахь ала акыр аинтерес амоуп. Ари ауааԥсыра рыбзазара еиӷьнатәуеит. Хымԥада, ас еиԥш иҟоу аҿырԥшқәа зҿлымҳара рыҭара иаԥсоуп. Уфа зыргылара иаҿу Аколоннада ҳажәларқәа ирыбжьоу аиҩызара иасимволхоит, иара убас зеиӷьыҟам ԥсшьарҭа ҭыԥхоит» - ҳәа иҳәеит Аслан Бжьаниа.
Аиԥылара ахыркәшамҭаз Башкорҭосҭан Ахада Ради Хабиров Аԥсны Ахада Ареспублика амш аҽны, 2024 шықәса жьҭаарамза 11 рзы Башкорҭосҭани Аԥсни ажәларқәа реиҩызара ахьӡала иргылахо Аколоннада аартра иазку аофициалтә усмҩаԥгатә ахь ааԥхьара ииҭеит.
Аиԥылара далахәын иара убас Башкорҭосҭан Ареспублика аԥыза-министр Андреи Назаров.
