Аҟәа. Нанҳәамза 30, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниеи Башкорҭосҭан Ахада Радии Хабирови Агәашьаркыра аргылара ахьымҩаԥысуаз иаҭааны ирбеит.
Ахада Аслан Бжьаниеи Башкорҭосҭан Ахада Радии Хабирови Уфа ақалақь, «Белаиа» аӡиас аԥшаҳәаҿы аԥсуа жәлари башкиртәи ажәлари реиҩызара ахьӡала Агәашьаркыра аргылара ахьымҩаԥысуаз иаҭааны ирбеит.
Ажурналистцәа данрыҿцәажәоз Аԥсны Ахада Аслан Бжаниа Башкорҭосҭан ауааԥсыра Уфа 450 шықәса ахыҵра рыдиныҳәалеит, инаҵшьны иҳәеит аҟәатәи Агәашьаркыра еиԥшу ари аргыламҭа ҳажәларқәа реимадара иасимволны ишыҟало.
– Сара даара сгәы азыбылуеит Башкорҭасҭан, уи иқәынхо ауааԥсыра, анапхгара. Ҳара ҳделегациа ари ахҭыс агәахәара ду рнаҭеит, агәра згоит аӷәӷәахара иаҿу ҳажәларқәа реиҩызара зырҵабыргуа ак акәны ишыҟоу. Ари ахҭыс аҭоурых аҟны наунагӡа инхоит. Уфа ауааԥсыра Аԥсны рдыруа иҟанаҵоит. Ари агәахәареи агәадуреи ҳазҭо усуп», - ҳәа иҳәеит Аслан Бжьаниа. – Башкорҭасҭан Ареспублика шьахә иқәынхо зегьы ирыдысныҳәалоит Уфа 450 шықәса ахыҵра, ирзеиӷьасшьоит аҭынчра, аизҳазыӷьара, аԥеиԥш лаша. Ара инхо ажәлар хандеиҩцәоуп, иаԥсоу анапхгарагьы рымоуп. Убри аҟнытә агәра згоит есааира аизҳазыӷьара, аҿиара амҩа шәшану. Ари идеиа бзиоуп. Иҭабуп ҳәа шәасҳәоит!
Башкорҭосҭан Ахада Ради Хабиров ажурналистцәа рыҿцәажәараан иҳәеит Аколоннада официалла аартра шыҟало «Белаиа» аӡиас аҟны.
– Жьҭаарамза 11 рзы, Башкорҭосҭан Ареспублика Амш аҽны Аԥсны Ахадеи аҟәантә аделегациа дуи ҳарзыԥшуп. Ҳаидгыланы ари Аколоннада ааҳартуеит, – ҳәа инаҵшьны иҳәеит Ради Хабиров.
Иргылахо Аколоннада иаҭааны ианырба ашьҭахь Аԥсны Ахада Аслан Бжьаниеи Башкорҭосҭан Ахада Ради Хабирови Ареспублика Актәи Ахада Мурҭаз Рахимов ибаҟа иаҭааит.
