Урыстәылатәи Афедерациа Аиҳабыра Ахантәаҩы Ихаҭыԥуаҩ иазгәеиҭеит аҵыхәтәантәи аамҭазы ареспублика аҿиара ишаҿу, ҷыдала, иахьатәи анапхгарала, Аҳәынҭқарра Ахада Аслан Бжьаниа инапхгарала.

«Анагӡара иаҿуп акрызҵазкуа аинвестициатә проектқәа, есааира иазҳауеит Аԥсни Урыстәылеи ирыбжьоу атауареикәыршара, ари аҵак ду амоуп ҳәа исыԥхьаӡоит.

Сара свизит хықәкы хаданы иамоуп Аԥсны атуристтә усхк алацәажәара. Аԥсны ахаангьы Асовет Еидгылазы абырлаш иаҩызан, убри аҟнытә урыстәылатәи атуристцәа хыԥхьаӡара рацәала арахь аара иаҿуп», - ҳәа иазгәеиҭеит Дмитри Чернышенко.

Атуристтә ҟәша иахцәажәо, аганқәа еиқәшаҳаҭны иазгәарҭеит ишазымхо ҳаамҭазтәи   аинфраструктура. Дмитри Чернышенко иҳәеит иахьа Урыстәыла атуризм даара азыҳәара шамоу. «Иахьа аамҭа зегьы аҭыԥ аҟны иаргылоит, иаабоит шәарҭара злам атуризм аиҩызаратә тәылақәа рҿы мацара ишалшо. Аԥсны – зыгәрагоу, ҩызара ҳзызуа тәылоуп, гәахәароуп ари алшара Шәара шәнапхгарала анагӡара ахьымҩаԥысуа», - ҳәа иԥхьаӡоит Дмитри Чернышенко.

Аиԥылараан иара убас иалацәажәеит алогистика азҵаара, ҷыдала, аԥсны-урыстәылатәи аҳәынҭқарратә ҳәаа аужьратә пункти аужьратә лшара арҭбаареи рус.

Амш азҵаараҟны иқәгылан Аҟәатәи аҳаиртә баӷәаза аусура аларгара азҵаара. Аслан Бжьаниеи Дмитри Чернышенкои иаҵшьны ирҳәеит авиаеимадара алыршара аекономикатә еизҳареи  Аԥсны Аҳәынҭқарра аизҳазыӷьареи хыԥхьаӡара рацәала атуристцәеи абизнесуааи радԥхьалареи ишацхраауа.