Аҟәа. Нанҳәамза 26, 2024 шықәса. Аԥсныпресс. Нанҳәамза 26 рзы Аҟәа ақалақь аҿы Аԥсны афинансқәа Рминистрреи Урыстәылатәи Афедерациа Аказначеиреи атехникатә усеицура рыбжьаҵара азы Амеморандум анапаҵыҩра мҩаԥысит.
Аусшәҟәы рнапы аҵарҩит Аԥсны аԥыза-министр ихаҭыԥуаҩ, афинансқәа рминистр Владимир Делбеи Урыстәыла Афедералтә Казначеира анапхгаҩы ихаҭыԥуаҩ Алеқсандр Демидови.
Аганқәа абарҭ ахырхарҭақәа рыла аусеицура рыбжьарҵоит:
– аказначеира аусбарҭақәа рфункциақәақәеи русура аиҿкаареи;
– абиуџьетқәа рымҩаԥгара аметодологиеи атехнологиеи;
– акассатә хархәагақәа рфинанстә зԥхьагәаҭареи рнапхгараҭареи;
– аказначеира аусбарҭақәа рҿы аинформациатә технологиақәа;
– абиуџьеттә ҳасаббареи аҳасабырбареи;
– абиуџьет анагӡара ахылаԥшреи ахәшьара аҭареи аҩныҵҟатәи аудит амҩаԥгареи.
«Гәахәара дууп атәыла азы акыр зҵазкуа ари амш аҽны Аԥсны шәбара. Ҳара аҩганктәи ҳаизыҟазаашьақәа рырҿиара ҳаҿуп. Иахьа акыр аамҭа ҳазлацәажәоз агәҭакқәа амеморандум анапаҵыҩрала анагӡара хацыркхоит.
Амеморандум ҳтәыла афинанстә система, ахәҭакахьала, аказначеира арҿиаразы иназыцҵоу алшара аԥнаҵоит», – ҳәа амеморандум анапаҵыҩра иазкыз ацеремониа алагаанӡа дықәгыло иҳәеит атәыла аԥыза-министр ихаҭыԥуаҩ, афинансқәа рминистр Владимир Делба. Иара Урыстәылатәи Афедерациа Афедералтә казначеира анапхгараҭара ахаҭарнакцәа иҭабуп ҳәа реиҳәеит Аԥсны аказначеира асистема аԥҵара аҿы уи иҟанаҵаз ацхыраара азы.
«Иахьа ҳара ирацәаны иҿыцу алагалақәа ҳамоуп. Ҳара иалаҳгалеит ирацәаны афинанстә инструментцәа. Шәара иҳашәҭаз адгыларала абиуџьеттә ҳасаббара автоматизациа иазку аусмҩаԥгатә мҩаԥысуеит. Ари ҳтәыла аекономика аҿиареи афинанстә, абиуџьеттә дисциплина арӷәӷәареи иацхраауа акыр зҵазкуа усны иҟоуп», – ҳәа иҳәеит Владимир Делба.
Афедералтә казначеира анапхгаҩы ихаҭыԥуаҩ Алеқсандр Демидов Аԥсны жәлар нанҳәамза 26 рзы иазгәарҭо ареспублика ахьыԥшымра жәларбжьаратәи азхаҵара Амш рыдиныҳәалеит.
«2016 шықәса раахыс шәареи ҳареи абиуџьет анагӡара асистема аԥҵара иазкны активла аусеицура ҳабжьоуп. Ҳара зегьы еилаҳкаауеит, иҭышәынтәалоу абиуџьеттә процесс ада еффективла аҳәынҭқара аҿиара шзалмыршахо, аказначеира абиуџьеттә политика анагӡара азы акыр зҵазкуа интрументны иҟоуп», – ҳәа иҳәеит иара.
Иара иажәақәа рыла, Аԥсны аказначеитә система аҿиара аҩаӡара ҳаракуп, уи уаанӡа имҩаԥгаз ауснагӡатәқәа алшәа бзиақәа аадырԥшит ҳәа ауп иаанаго.
«Ҳара ҳусеицура изаамҭанытәиу аетап ҳахысуеит. Уи абиуџьет анагӡара аказначеитә система арҿиара азҵаарақәа рыла аусеицуреи аицхыраареи рзы амеморандум ала иҳәаақәҵахоит», – ҳәа иҳәеит Алеқсандр Демидов.
Иара убасҵәҟьа Урыстәыла иахьа аинтерес зҵоу ахырхарҭақәак ыҟоуп, урҭ аказначеира ажәлар рԥарақәа рхархәашьа амҩаԥысшьа аарԥшра иадҳәалоу афункциа анагӡара иацхраауеит ҳәа иазгәеиҭеит.
