Сергеи Уасил-иԥа Багаԥшь ихьӡ иадҳәалоуп Ареспублика Аԥсны ахьыԥшымра жәларбжьаратәи азхаҵара, Урыстәылатәи Афедерациеи егьырҭ атәылақәеи Аԥсни аиҩызаратә, аидгыларатә еизыҟазаашьақәа рыбжьаҵара.
26.Нанҳәа.2024
Аслан Бжьаниа Сергеи Багаԥшь анышә дахьамадоу ашәҭ шьыҵәрақәа шьҭеиҵеит.
Аҟәа. Нанҳәамза 26, 2024 шықәса. Аԥсныпресс. Нанҳәамза 26, Аԥсны аҳәынҭқарратә хьыԥшымра жәларбжьаратәи азхаҵара Амш аҽны, Аҳәынҭқарра Ахада Аслан Бжьаниа Очамчыра араион Џьгьиарда даҭааит. Араҟа анышә дамадоуп Аԥсны Аҩбатәи Ахада Сергеи Багаԥшь.
Аҳәынҭқарра Ахада, Ахада Ихаҭԥуаҩ Бадра Гәынба, Жәлар Реизара-Апарламент Аиҳабы Лаша Ашәба, Жәлар Реизара-Апарламент адепутатцәа, Аҳәынҭқарра Ахада Иусбарҭа ахаҭарнакцәа, Аминистрцәа Реилазаара алахәылацәа, Аԥсны иҟоу Урыстәылатәи Афедерациа ацҳаражәҳәаҩ Михаил Шургалин, Урыстәылатәи Афедерациа Аҳәынҭқарратә Дума адепутат Константин Затулин, Аԥсны иҟоу Аахыҵ Уаԥстәыла ацҳаражәҳәаҩ Олег Боциев, Аахыҵ Уаԥстәыла адәныҟатәи аусқәа рминистр Ахсар Џьиоев, аибашьра аветеранцәа, иҭахаз аибашьцәа ранацәа, ауаажәларра рхаҭарнакцәа Сергеи Багаԥшь иҳаҭгәын аҿы ашәҭ шьыҵәрақәа шьҭарҵеит.
