Аҟәа. Нанҳәамза 26, 2024 шықәса. Аԥсныпресс. Аҟәа ақалақь аҿы ихыркәшахеит Аԥсны Зҽаԥсазтәыз ашьапылампыл азы азыҟаҵаҩ, Аԥсны Зҽаԥсазтәыз абаҩарҵәыратә культура аусзуҩ Иури Логәуа игәалашәара иазку, 2016 шықәса рзы ииз ахәыҷқәа рыбжьара ашьапылампыл азы Ареспубликатә ахәыҷтәы-қәыԥштә турнир.
Атурнир аихшьаалақәа рыла, актәи аҭыԥ ааннакылеит акоманда «Динамо» Аҟәа, аҩбатәи аҭыԥ – Ахәмаррақәа рзы Ареспубликатә ахәыҷтәы-қәыԥштә спорттә школ, ахԥатәи аҭыԥ – Гәдоуҭа ақалақь ахәмаррақәа рзы Ахәыҷтәы-қәыԥштә спорттә школ.
Иури Логәуа игәалашәара иазку ашьапылампыл азы ахәыҷтәы-қәыԥштә турнир мҩаԥысуан нанҳәамза 24 – 26 рзы. Уи рхы аладырхәит ф-командак.
Атурнир аиҿкаара ахахьы иргеит – Ахәмаррақәа рзы Ареспубликатә ахәыҷтәы-қәыԥштә спорттә школи Аԥсны ашьапылампыл Афедерациеи.
Аӡбаҩ хада – Аԥсны Зҽаԥсазтәыз азыҟаҵаҩ, Ахәмаррақәа рзы Ахәыҷтәы-қәыԥштә спорттә школ азыҟаҵаҩ Ободин Владимир Валентин-иԥа.
