Аҟәа. Нанҳәамза 23, 2024 шықәса. Аԥсныпресс. Иахьа аҿари аспорти русқәа рзы Аҳәынҭқарратә Еилакы аҿы аԥкьаҭмпыласҩы қәыԥш Нестор Цужба иԥылара мҩаԥысит.
«Ҳара гәахәара дула иудаҳәныҳәалоит қәҿиарала уқәгылара. Ааигәа уара европатәи аԥкьаҭмпылтә турнир TE BATD Cup #1 La Cure U12 афиналтә матч аҿы Бельгиатәи иԥхьагылоу аԥкьаҭасҩи уареи шәеицлабра ашьҭахь араӡнытә аԥхьахә угеит. Уи ашьҭахь уара Аԥсны Афырхацәа Арзамеҭ Ҭарбеи Салыбеи Арӡынбеи ргәалашәара иазкны имҩаԥгаз Иаарту ареспубликатә турнир аҿы зхала иҟоу ахәмарра аҿы аиааира угеит, аихацалактә хәмарра аҿы араӡнытә аԥхьахә угеит. Ҳара есымша ҳаигәырӷьоит уқәҿиарақәа, уара уеихьӡарақәа иазҿлымҳауп, иаргәырӷьоит милаҭрацәала еилоу ҳажәлар зегьы. Уқәраҿы иҟоу ахәыҷқәа уҿыԥшуеит, уара уеиԥш иҟаларц рҭахуп. Ҳара иузеиӷьаҳшьоит ақәҿиара дуқәа, аманшәалара», - ҳәа иҳәеит Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба.
«Аферым, даара иаԥсаны, ибзианы ухы ааурԥшуеит. Ҳреспублика зегьы уеихьӡарақәа рыла ргәы дууп. Иузеиӷьаҳшьоит ақәҿиарақәеи аихьӡарақәеи аиааира дуқәеи!», – ҳәа иҳәеит Аҳәынҭеилакы ахантәаҩы ихаҭыԥуаҩ Роман Цкәуа.
«Сара гәахәарыла исыдыскылоит Европа ахәмарра азы алшара ахьсымоу, убри аан сыԥсадгьыл, Аԥсныгьы сахьыхәмаруа», – ҳәа иҳәеит Нестор Цужба. Уи ԥхьаҟатәи игәҭакқәа дрылацәажәеит. Аиԥылара ахыркәшамҭаз аспортсмен Аҳәынҭеилакы ахьӡала аԥаратә ҳамҭа ианаршьеит.
Ахәҭакахьала, Нестор Цужба Ҭарашь Ҳагба ҳамҭас иҭеит иара Бельгиа атурнир аҿы дызлахәмаруаз аԥкьаҭ.
Нестор Цужба Алеқсандр Островски ихьӡ зху Академиа аҿы Александр Мальцев инапхгарала иҽазыҟаиҵоит. Иара аԥкьаҭмпыл азы Аԥсны аспорт азҟаза Елизабет Акәыциа лааӡамҭа иоуп.
