Аҟәа. Нанҳәамза 26, 2024 шықәса. Аԥсныпресс. Нанҳәамза 26 – Аԥсны Аҳәынҭқарра Ахьыԥшымра жәларбжьаратәи азхаҵара иамшуп. Аԥсны Жәлар Реизара – Апарламент Аиҳабы Ашәба Лаша Аԥсны Аҳәынҭқарра Ахьыԥшымра жәларбжьаратәи азхаҵара аҽны адныҳәалара ҟаиҵеит.
Адныҳәалараҟны иҳәоуп:
«Ҳаҭыр зқәу ҳауаажәлар! Аԥсны Жәлар Реизара – Апарламент ахьӡала ишәыдысныҳәалоит Аԥсны Аҳәынҭқарра Ахьыԥшымра жәларбжьаратәи азхаҵара амш!
2008 шықәса нанҳәамза 26 Урыстәылатәи Афедерациа Аԥсны Аҳәынҭқарреи Алада Уаԥстәылеи рхьыԥшымра азхаҵара иазку ажәабжь ҳзаазгаз аҭоурыхтә ҵакы змоу мышны иҟалеит. Ари амш Аԥсны жәлар зегьы рзы ныҳәа дууп. Ашәышықәсақәа раахыс аԥсуа жәлар зеиԥхыӡуаз, гәҭыхас ирымаз наӡеит – иахьа зхы иақәиҭу ихьыԥшым Аԥсны Аҳәынҭқарраҟны инхарт-инҵыртә аҭагылазаашьа рымоуп.
Ҳара ҳажәлар ҳаҭырла иргәаладыршәоит астратегиатә ҩызара ҳзызуа Урыстәылатәи Афедерациа анапхгара абри аҽны иҟарҵаз аҵак ду змоу ашьаҿа.
Аԥсны Жәлар Реизара – Апарламент ахьӡала ҳауаажәлар ирзеиӷьасшьоит аԥеиԥш бзиа, аихьӡарақәа ҳҳәынҭқарра аргылареи арҿиареи рыҟны».
