Аҟәа. Нанҳәамза 16, 2024 шықәса. Аԥсныпресс. Аиустициа Аминистрра аҿы атәыла аҩныҵҟатәи аусқәа Рмирнистрра Автоҳәынҭинспекциа анапхгараҭара алархәна аиԥылара мҩаԥысит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Аиустициа аминистр ихаҭыԥуаҩ Руслан Лагәлааи Автоҳәынҭинспекциа анапхгаҩы инапынҵақәа назыгӡо Дамеи Аҩӡбеи амҩатә ԥҟарақәа реилагара азы административтә хараԥсақәа рыршәара иадҳәалоу азҵаарақәа рҿы анапхгарабжьаратәи аусеицура активизациа иазырханы иҟаҵатәу ашьаҿақәа ирылацәажәеит.
Дамеи Аҩӡба амҩаҿы аныҟәара ашәарҭадара иадҳәаоу азҵаарақәа иҿыцу азнеишьақәа рҭахуп ҳәа иазгәеиҭеит.
Уи иажәақәа рыла, Автоҳәынҭинспекциа Аусбарҭеи егьырҭ аҳәынҭқарратә усбарҭақәеи доусы ркомпетенциа иақәшәо ала русеицура амашьына арныҟәцара акультура аҩаӡара ашьҭыхреи ауааԥсра ргәабзиареи рыԥсҭазаареи реиқәырхареи алнаршоит.
«Амҩаҿы аныҟәара аганахьала административтә зинеилагара ҟазҵаз ахаҿы хымԥада ахьырхәра дақәыршәазароуп. Убас иҟоу азнеишьала ауп ҳтәыла аҿы иарбру азинеилагарақәа рырмаҷреи, уи инамаданы амҩатә машәыртә хҭысқәа рацәцареи шзалыршахо», – ҳәа инаҵшьны иазгәеиҭеит аиустициа аминистр ихаҭыԥуаҩ Руслан Лагәлаа.
Аилатәара иалахәыз амҩатә ԥҟарақәа реилагаразы административтә хараԥсақәа ршәара зҽахызго ауаа раарԥшраан еиҳа аеффективра злоу аусеицура амеханизм шьақәдыргылеит. Ҷыдала ахшыҩзышьҭра аҭан ижәны, ма арҩышьыгатә маҭәашьарқәа зыдкыланы амашьына аԥскы зкызи, арццакра арежим аиҳахара азы аҭакԥхықәра иақәыршәаз атәылауаа ахараԥсақәа рыршәара алыршара.
Аиустициа Аминистрра аӡбаратә нагӡаҩцәа Рмаҵзура амҩатә шәарҭадара ашьақәыргылара аҿы ацхыраара аҳасабала, иара убас азинмчы еффективла анагӡара хықәкыс иҟаҵаны, административтә хараԥсақәа ршәара цасҳәа зҽахызго ауаа рганахьала атранспорттә хархәагақәа рхархәара азы аԥкрақәа рмеханизм аланагалоит.
Аиустициа Аминистрра иатәу аӡбаратә нагӡаҩцәа Рмаҵзура аҩныҵҟатәи аусқәа Рминистрра иатәу Автоҳәынҭинспекциа Аусбарҭеи еицны иарбоу ахаҿқәа ирықәу ауал дыршәара иазку ауснагӡатә аҳасабала урҭ иртәу рмашьынақәа рымхра мҩаԥыргалоит.
