Аҟәа. Нанҳәамза 16, 2024 шықәса. Аԥсныпресс. Аҳәынҭқарра Ахада Аслан Бжьаниа Гәылрыԥшь араион Ахадара ҳазҭоу 2024 шықәса актәи азыбжа азы аусура хар амамкәа имҩаԥгоуп ҳәа ахәшьара аиҭеит. Абри азы иара аҳәамҭа ҟаиҵеит араион Ахадара аҿы имҩаԥысыз аҳасабырбатә еилатәара аҿы.
Аҳәынҭқарра Ахада араион аекономика шьаҿа-шьаҿа аҿиара ишаҿу азгәеиҭеит.
«Араион инеиԥынкыланы аекономикатә ҿиара мҩаԥысуеит, апроблемақәа рыӡбара иаҿуп, апроблемақәа еиҳа имаҷхо иаауеит, уи азгәаумҭар залшом хымԥада, аха еиҳа, еиӷьзаргьы ҟалоит. Араион аҿы аобиективтә мзысқәа ирыхҟьаны макьаназы иӡбамкәа иаанханы иҟоу азҵаарақәагьы маҷӡам»,- ҳәа аҳасабырбақәа ҟазҵоз аусбарҭақәа рыҟәшақәа данырзыӡырҩы ашьҭахь иҳәеит Аҳәынҭқарра Ахада.
Иара иалкааны проблемақәак дырзааҭгылеит. Урҭ иреиуоуп афымцамч ахархәаразы аизгатә ҟаҵарба реиӷьтәра ахымԥадатәра. Иҟоу азгәаҭарақәа рыла аҭагылазаашьа агәҭынчымра узцәырнагартә иҟоуп.
«Ҳара ахархәара зауз афымцмч азы ашәатәқәа реизгара алҳмыршар, усҟан имариам аҭагылазаашьа шьақәгылар алшоит. Абар шьҭа ашықәсқәа инеиԥынкыланы ҳара, аиҳарак аӡынтәи аамҭахәҭа азы афымцамч азымхара арежим аҿы ҳанхоит, афымцамч наҟынтәи иаахәаны иааҳгар акәхоит. Убри аҟнытә ҳара уи азы аԥарақәа рхианы иҳамазароуп. Ҳауаажәлар фымцалашарада иаанымхарц азы араион Ахадареи иарбоу азҵаара аӡбара иазинтересу аусбарҭақәеи еицхырааны хра злоу алҵшәа аарԥшра рҽазыршәароуп», – ҳәа иҳәеит Аслан Бжьаниа.
Аҳәынҭқарра Ахада иара убас ахшыҩзышьҭра аиҭеит атуристтә усхкы аҿы иҟоу арбагақәа. Аслан Бжьаниа иазгәеиҭеит араион аҟны атуризм аҿиара бзиа шамоу. Убри аан иара иҳәеит асасааирҭақәа рыԥшәмацәа агәаҭарақәа рзы ашшыԥхьыӡ шаанрыжьуа. «Ганкахьала, асасааирҭатә ҩнқәа рхыԥхьаӡара ессааира иацлоит, аха даҽа канкахьала уахәаԥшуазар - аотелиерцәа рҟынтәи амилициеи апрокуратуреи рганахьала инамыцхәны ахылаԥшра ыҟоуп ҳәа агәынамӡарақәа аадырԥшуеит», - ҳәа иазгәеиҭеит иара. Аслан Бжьаниа аҳәара ҟаиҵеит акурорттә аамҭазы асасааирҭақәа ргәаҭарақәа рмаҷзарц.
«Аҳәара сымоуп, агәаҭарақәа мҩаԥыргаларц акурорттә аамҭа ианалаго, ма инхыркәшахалакгьы. Урҭ мҩаԥгалатәуп иахымырҟьаӡакәа. Ауаа ршьапы иқәгылароуп. Ауаа агәаӷьра аарԥшны рԥарақәа абизнес иаларҵеит џьара акы дырҳарц азы, – ари хазхаҭалатәи акапитал ауп. Дара роуп аиҳарак иахьа ҳбиуџьет шьақәзыргыло, урҭ аусуратә ҭыԥқәа аԥырҵоит, рҭаацәарақәа ныҟәыргоит, уигьы аҳәынҭқарратә шьақәгылара аҿы хра злоу лагалоуп. Аҳәынҭқарра зыҟоу, уи атәылауаа рматериалтә ҭагылазаашьа бзианы инхаларц, рыпроблемақәа рхала ирыӡбо иҟаларц азы ауп», - ҳәа иҳәеит Аслан Бжьаниа.
Аҳәынҭқарра Ахада гәахәарыла иазгәеиҭеит араион аҿы аинвестор дуқәа шыҟалаз.
«Ҳара зны-зынла аҿагыларақәа ҳауеит, ҳанеилырымкаауагьы ҟалалоит, аха иагьа ус иҟазаргьы аекономикатә ҿара апроцесс цоит. Ҳекономика ихадоу усхкны иҟоу - атуризми уи иадҳәалоу зегьы - ақыҭанхамҩа аҿиара, иҿыцу аусуратә ҭыԥқәа раԥҵара, уҳәа ауп», - иҳәеит Аслан Бжьаниа. Уи ахылаԥшратә усқәа ауаажәларреи аҳәынҭқарреи ринтересқәа ҳасаб рзурала, азакәан инақәыршәаны имҩаԥгалатәуп ҳәа инаҵшьны иазгәеиҭеит,
Аҳәынҭқарра Ахада ахә бзианы ишьеит Гәылрыԥшь араион азинхьчаратә усбарҭақәа русура. «Астатистика цәгьаӡам: ацәгьоурақәа рхыԥхьаӡара рацәам», - ҳәа иҳәеит Аслан Бжьаниа. Убри аан ирыдиҵеит азинхьчаратә усбарҭақәа реилазаарақәа еиқәшәаны русура мҩаԥыргаларц. «Ҳауаажәлари ҳасасцәеи хьчазароуп, ршәарҭадара алыршазароуп», - ҳәа иҳәеит Аҳәынҭқарра Ахада.
Аслан Бжьаниа азҵаара шьҭихит аҵарашықәс ҿыц алагамҭа арҵаратә усбарҭақәа ахьынӡазыхиоу инамаданы. Араион Ахада адҵа ииҭеит аҵара алагамҭазы зыда ԥсыхәа ыҟам аусмҩаԥгатәқәа реиҿкааразы.
Аслан Бжьаниа араион Ахадара иҭабуп ҳәа реиҳәеит инарыгӡо аусура азы. Убри аан уи агәыӷра ааирԥшит аринахысгьы араион активла аҿиара шысҩаԥысло азы.
́
