Аҟәа. Нанҳәамза 15, 2024 шықәса. Аԥсныпресс. Нанҳәамза 15 рзы Аԥсны Афырхацәа Арзамеҭ Ҭарба ихьӡ зху аԥкьаҭмпыл азы Ареспубликатә школ аҿы иалагеит Аԥсны Афырхацәа Арзамеҭ Ҭарбеи Салыбеи Арӡынбеи ргәалашәара иазку аԥкьаҭмпыл азы Иаарту атурнир, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.
Атурнир аартра аҿы уи алахәылацәа ирыдныҳәалеит Аԥсны аҿари аспорти русқа рзы Аҳәынҭқарратә Еилакы ахантәаҩы ихаҭыԥуаҩ Беслан Карчаа, Аԥсны аԥкьаҭмпыл Афедерациа апрезидент Ҭамаз Абӷаџьааи Арзамеҭ Ҭарба иан Гәыли Кьычбеи.
«Ари атурнир 1995 шықәса раахыс есышықәса имҩаԥыргоит. Ари акорт аҿы, шәара иахьа шаҟа шәхыҵуа аҟара анихыҵуаз испорттә мҩа данылеит Арзамеҭ. Аха, рыцҳарас иҟалаз, аибашьра уи иԥсҭазаареи игәҭакқәеи ҿыхнаҵәеит. Иҟалар ҟалап, ус иҟамлазҭгьы, иаргьы иахьа аспорттә ҩаӡарақәак рҟынӡа анаӡара илшазҭгьы», - ҳәа иазгәалҭеит Гәыли Кьычба.
Атурнир ареспублика араионқәа зегьы рҟынтәи, иара убас Москвеи Санткт-Петербурги ақалақьқәа рҟынтәи рхы аладырхәуеит 70 - ҩык рҟынӡа аспортсменцәа. Атурнир ахь иааит Швеицариантәи аспортсменцәагьы.
Аицлабрақәа хыркәшахоит нанҳәамза 19 рзы.
Атурнир аиҿкаара рхахьы иргеит Аԥсны аҿари аспорти русқәа рзы Аҳәынҭқарратә Еилаки Аԥсны аԥкьаҭмпыл азы Афедерациеи.
