Апиеса гәыцә хаданы иагәылагылоуп амчра знапаҿы иҟоу асистемеи анхаҩи ринтересқәа реиҿагылара, Викториа Печерникова лгәаанагарала ари ианакәзаалак актуалра аҵазаауеит.

Аспекталь ақәыргылараз урыстәылантәи Аԥсныҟа дааԥхьан асценограф, акостиумқәа рзы асахьаҭыхҩы Улиана Ериомина.

«Антигона» - ажәытә бырзен драматург Софокл итрагедиа иазкуп, раԥхьаӡа акәны иқәыргылан 442 шықәсазы ҳера ҟалаанӡа.

Арежиссиор иара убас, Софокл испетакль   «Антигона» акыр афранцызтә версиа еиԥшӡам ҳәа иазгәалҭеит. 1942 шықәсазы Париж ақалақь аҿы иҩыз  Жан Ануи ипиеса, ахәҭакахьала, афранцыз жәлар зегьы анацистцәа раккупациа аганахьала рыҩныҵҟатәи апротест аанарԥшуеит ҳәа илыԥхьаӡоит. «Жан Ануи лассы-лассы антикатә сиужетқәа дрызхьаԥшуан. Антикатә сиужет – ари аклассикатә сиужет ауп, алассикатә конфликт ауп, аха ажәытәбырзентә трагедиа акырӡа еиԥшӡам уи. Софокл иҿы – ари ажәытәбырзентә трагедиа ауп, араҟа зегьы заџьал аахьоу роуп, Антигонагьы уаҳа ԥсыхәа лымаӡам аҳ Креонт иҳәатәы халымҵар. Лара лзы акырӡа аанагоит лашьа анышә иамадара, уи иԥсы ҭынчхарц азы, анцәахәқәа рҟынӡа иԥсы наӡарц, џьанаҭ гыларҭас иоурц азы.  Уажәтәи ахҭыс аҿы Антигона – зыԥсы ҭоу ауаҩԥсык, зынӡа ифырхаҵам, заб  иашьа иҿагыларазы зшәарақәа риааира иашьҭоу, аха уи митәык изықәымҿио ӡӷаб хәыҷык лакәны даақәгылоит. Ҳара «афырхаҵас аҟалара» заку даҽакала иаабоит, еилаҳкаауеит», – ҳәа еиҭалҳәеит Викториа Печерникова. Адраматургцәа рҩыџьагьы изхьаԥшуа есымша аҭыԥ змаз «абацәеи аԥацәеи» рконфликт ауп, аха Софокловтәи «Антигона» аҩреи Ануи «Антигона» аныиҩыз аамҭеи ирыбжьоу азқьышықәсақәа еиԥшу  афырхацәа злоу асиужет еиуеиԥшым ала аилкаара мзыс иаиуеит. 

Аспектакль аҿы ишаҳәо ала, аҳ Едип иԥацәа руаӡәк Антигона Полиник иқалақь Фифы иҭиуеит, дагьҭахоит иашьа Етеокли иареи реибашьраҿы.

Аҳ Креон ачарҳәаҩ анышә иаҭара мап ацәикит, насгьы иԥсыбаҩ аҵарақәеи алақәеи ирыхәхарц ириҭоит.

Антигона азин лымамкәа адин ныҳәак ахьыналыгӡоз азы, Креон адҵа ҟаиҵеит абнаҿы дҭаркырц.

Антигона аҳ изыӡырҩра аасҭа аԥсра алылхит, аԥсҭазаара лнапала лхы алылхоит. Уи ашьҭахь, Антигона дызгараны иҟаз, Креон иԥа Гемон аҳәызба игәы иалеиҵоит. Зԥа дҭахаз аҳ иԥҳәыс Евридика лҽылшьит.

Аспектакль аҿы ароль хадақәа нарыгӡеит Есма Шуген (Антигона), Ареспублика Аԥсны Зҽаԥсазтәыз артист Аслан Анқәаб (Креон), Мдар Сақаниа (ахор), Диана Абыхәба (Исмена), Леон Барчан (Гемон), Альдона Адлеиба (анаӡӡеи), Ахра Кәарҷиа (ахьчаҩ Будусс), Вадим Абыхәба (ахьчаҩ Жона), Ҳаџьараҭ Џьопуа (ахьчаҩ Диуран), Аахыҵ Уаԥстәылатәи Ареспублика Зҽаԥсазтәыз  артист Фрида Леиба (Евридика), Инна Качараа (Лахесис), Елла Туова (Клото), Еснаҭ Ҳаразиа (аҷкәын).       

Аспектакль «Антигона» дырбахоит нанҳәа 8, 21 рзы Аԥснытәи аҳәынҭқарратә драматә театр аҟны.