Аҟәа. Нанҳәамза 8, 2024 шықәса. Аԥсныпресс. Нанҳәамза 8, 2024 шықәса рзы Қырҭтәыла жәларбжьаратәи аиқәшаҳаҭрақәа зегьы еилаганы Аахыҵ Уаԥстәыла ианақәла амш 16 шықәса ахыҵит. Алахьеиқәҵаратә Мшы инамаданы Урыстәылатәи Афедерациа аҿы иҟоу Аахыҵ Уаԥстәылатәи Ареспублика Ацҳаражәҳәарҭа ала агәалашәаратә усмҩаԥгатәқәа еиҿкаан.
Москва ақалақь, Қьырса Аԥсеиқәырхаҩ ихьӡ зху аныхабаа аҿы Аахыҵ Уаԥстәыла жәаф шықәса раԥхьа иҟалаз атрагедиа иахҟьаны иҭахаз аҭынч уааԥсыра, Цхьынвал ахьчаҩцәа, ауаԥстәии урыстәылатәии Абжьаҟазаратә мчрақәа рыруааи, иара убас урыстәылатәи ар асолдатцәеи афицарцәеи, зыԥсҭазаара ақәҵаны Аахыҵ Уаԥстәыла ақәхра иацәызыхьчоз зегьы ргәалашәара иазкны апанихида мҩаԥыргеит.
Ари агәалашәаратә церемониа даҭааит Урыстәыла иҟоу Аԥсны ацҳаражәҳәаҩ Алхас Кәыҵниа. Уи иколлега, Урыстәыла иҟоу Аахыҵ Уаԥстәыла ацҳаражәҳәаҩ Знаур Гассиев дидышшыло аиашьаратә Аахыҵ Уаԥстәыла ажәлар рахь имоу аҳаҭырқәҵареи адгылареи ааирԥшит.
Традициала ишаԥу еиԥш апанихида иаҭааит аҳәаанырцәтәи ацҳаражәҳәаҩцәеи адипломатцәеи, иара убас урыстәылатәи аофициалтә хаҿқәа, аҿартә еиҿкаарақәа рхаҭарнакцәа.
Абри азы Аԥсныпресс ахь адырра ҟанаҵеит Урыстәыла иҟоу Аԥсны Ацҳаражәҳәарҭа апресс-маҵзура.
