Аҟәа. Нанҳәамза 4, 2024 шықәса. Аԥсныпресс. II Жәларбжьаратәи амузыкатә фестиваль - 2024 хыркәшахеит нанҳәамза 3, асабша, Пицундатәи аныхабаа аконцерттә зал аҿы. Афестиваль асахьаркыратә напхгаҩи адиректор хадеи, апионист қәыԥш, адирижиор Барас Кәыџба иоуп. Уи Аԥныпресс акорреспондент диҿцәажәо имҩаԥысыз афестиваль азы игәаанагарақәеи ҳаԥхьаҟа иҟоу азԥхьагәаҭарақәеи дрылацәажәеит.
Пицундатәи афестиваль ҩышықәсоуп имҩаԥыргоижьҭеи, иара аартын ԥхынгәы 29 рзы. Амузыкатә фестиваль есышықәса иаднаԥхьалоит хыԥхьаӡара рацәала амузыкантцәеи аҟаза абзиабаҩцәеи. Сынтәа уи қәҿиара дула имҩаԥысит. Уи рхы аладырхәит еиуеиԥшым атәылақәа жәпакы рҟынтәи 35-ҩык асолистцәа. Аусмҩаԥгатә амҩаԥгара аҩаӡара еиҳагьы ишьҭнахит Аԥсны Аҳәынҭқарратә хортә капелла алахәхареи асахьаҭыхҩы – аиҿкааҩ Чанба илагалеи. Арҭ амшқәа ирылагӡаны Пицундатәи ауахәамаҟны инагӡан амузыкатә программақәа жәба. Афестиваль аҿы аԥснытәи еиԥш аҳәаанырцәтәи быжь-тәылак рҟынтәи артистцәа инарыгӡеит 24 аинструменталтә, авокалтәи ахортәи акомпозициақәа.
Афестиваль аҳәаақәа ирҭагӡаны еиуеиԥшым анашанақәа мҩаԥысуан. Ус, Аҳәынҭқарратә хортә капеллеи, Урыстәылантәи афестиваль иаҭааз Богдан Гуеноки, Ермантәылантәи — Жак Мартиросиани аԥсуа жәлар рашәа «Ауардын» еицынарыгӡеит.
Даҽа шәак ааигәа зыԥсҭазаара иалҵыз Аԥсны Зҽаԥсазтәыз артист Назырби Ебжьноу игәаларшәара иазыркит.
Барас Кәыџба афестиваль қәҿиарала ишымҩаԥысыз азгәеиҭеит.
«Ҳагәҭақәа рӷьырак рынагӡара ҳалшеит. Ҳконцертқәа рҟынтәи иҳарҳаз аԥаратә хархәагақәа зегьы ақалақь аҿиара иазырхахоит. Сынтәа урҭ, уажәы иҟоу ахьажәыз инамаданы, иҿыцу арлашаратә еиқәыршәагақәа раахәарагьы уахь иналаҵаны, Пицундатәи аныхабаа аконцерттә зал арҿыцрахь идәықәҵахоит», - ҳәа иҳәеит иара.
Аусмҩаԥгатә аиҿкааҩцәа афестиваль еиҳагьы аҵакы аманы, еиҳагьы ауаа аднаԥхьало аҟаҵара гәҭакыс ирымоуп. Уи ҳаԥхьаҟа мҽхакы ҭбаала аусура азԥхьагәаҭоуп ҳәа ауп иаанаго. Барас Кәыџба ари атрадициа шьахә анаҩсгьы ацҵареи аҿиареи рзы аусура дшазхиоу азгәеиҭеит. Уи еиуеиԥшым артистцәеи аколлектиақәеи аус рыцура, рыҽрымадара азԥхьагәаҭаны имоуп. Уи анаҩсгьы, П. И. Чаиковски ихьӡ зху Москватәи аконсерваториа аушьҭымҭаны иҟоу Барас Кәыџба иҵара аспирантура аҿы иациҵарц игәы иҭоуп.
Аусмҩаԥгатә иалахәыз афестиваль даара ирацәаны хра злоу ацәыныррақәа рызцәырнагеит, анырра бзиа рнаҭеит ҳәа иазгәарҭеит. Урҭ дрылацәажәеит аусмҩаԥгатә аиҿкааҩцәа иреиуоу аменеџьер Арсени Чакмач:
«Ари акы иаламҩашьо цәанырроуп, иубаз аџьабаа алҵшәа ублала ианубо, ауаа уи шрыдыркылаз анубо. Ҳара даараӡа ҳақәгәыӷуеит афестиваль даҽа акыр шықәса ишымҩаԥысло».
Ахәаԥшҩы Иарослав Бориаев иажәақәа рыла, афестиваль еиуеиԥшым ажәларқәа, акультурақәа еиднакылоит, аха уеизгьы иазгәаумҭар залшом амузыкантцәа доусы ирымоу иҷыдоу хазхаҭалатәи рыстиль, уи, жәаҳәарада, аусмҩаԥгатә ауникалтә ҟазшьа анаҭеит.
Пицундатәи Жәларбжьаратәи амузыкатә фестиваль традициатәла, Аҳәынҭқарратә хортә капелла инанагӡаз ашәа «Шьардаамҭа» ала ихыркәшан. Ашәа ахәаԥшцәеи алахәылацәеи акы иаламҩашьо ацәаныррақәа рызцәырнагеит.
Адирижиор — афестиваль ашьаҭаркҩы, асахьаркыратә напхгаҩы — П.И. Чаиковски ихьӡ зху Аҳәынҭқарратә консерваториа аушьҭымҭа Барас Кәыџба.
Ауснагӡатә хыркәшо Барас Кәыџба афестиваль иалахәыз зегьы иҭабуп ҳәа реиҳәеит.
«Згәы ҭбаау уаауп, зеиԥш ыҟам артистцәоуп, дара зегьы ҳфестиваль иацхраауеит. Ҳфестиваль иаҭаауеит ҳаиҩызара иабзоураны, дара ҳфестивальи, хақалақьи, ҳтәылеи рыгәра ргоит», - ҳәа иҳәеит иара.
Пицундатәи афестиваль мҩаԥысуан ԥхынгәы 29 инаркны нанҳәа 3 рҟынӡа. Уи иалагӡаны амузыкатә программақәа жәба мҩаԥган, иқәгылеит Аԥсны, Азербаиџьан, Ермантәыла, Беларуссиа, Китаи, Урыстәыла, Еиду Америкатәи аштатқәа, Ҭырқәтәыла, уҳәа атәылақәа рҟынтәи амузыкантцәа.
