Петербургтәи Жәларбжьаратәи Аекономикатә Форум-2024 (ПМЭФ-2024) аҿы Алеқсандр Беглови Аслан Бжьаниеи атуризм, ахәаахәҭра-економикатәии аинвестициатәи аусеицура иадҳәалоу апроектқәа ирылацәажәеит, егьырҭ аусхкқәа жәпакы рганахьала аусеицура аҳәаақәа рырҭбааразы еиқәшаҳаҭхеит.
Ԥхынгәымзазы Аҟәа ақалақь анапхгара ааԥхьарала Петербург ақалақь аделегациа Аҟәа ақалақь Амш азгәаҭара ахы аланархәит.
Ахәаахәҭра-економикатә усеицура аҿиара иаҿуп, аусдкылаҩцәа реимадара еиҳа-еиҳа аҽарҭбаауеит. Иҳаҩсыз ашықәс, абҵарамзазы афорум мҩаԥган. Уаҟа абизнес атуристтә усхкы аҿы ахатә проектқәа рыдгалара мҩаԥнагеит.
«Атуризм – Аԥсны ихадоу аусхкы ауп. Ҳара уи ҳаидгыланы аҿиара ҳалшоит. Ареспублика Урыстәылантәи иаауа асасцәа акыр иазҿлымҳауп. Атуризм аҿиаразы иаҭахуп зыҩаӡара ҳараку аинфраструктура. Уи аганахьала ҳара ацхыраареи адгылареи рыҟаҵареи Аԥсны ахаҭарнакцәа аус рыцуреи ҳазхиоуп», - ҳәа иазгәеиҭеит агубернатор.
Аҩадатәи аҳҭнықалақь ахада егьырҭ аусхкқәагьы рҿы: иаагозар, афатә-ажәтә џьармыкьақәа ҳаамҭа иақәшәо агастрономиатә ҵакырақәаны рыҟаҵара азы арекоснтрукциақәа рымҩаԥгара, ақалақнҭыҵтәи акотеџьтә ргыларақәа, аресторантә бизнес аҿиара, уҳәа рҿы аԥсуа ган азы абизнес-партниорцәа азыԥшаара аганахьала ацхыраара аҟаҵара дшазхиоу азгәеиҭеит.
Алеқсандр Беглов ҭагалан, 2024 шықәсазы Петербург Аԥсныҟа абизнес-миссиа амҩаԥгара аҽазыҟанаҵоит ҳәа иазгәеиҭеит. Араҟа ишьҭыхыз атемақәеи егьырҭ апроектқәа инацҵаны рылацәажәара азԥхьагәаҭоуп. Иара убас иазԥхьагәаҭоуп – аспорт, аҵарадырра, акультура, аҿартә политика аусхкқәа рганахьала аимадарақәа рымҽхак арҭбаарагьы.
«Аԥсны ҷыдала ахшыҩзышьҭра арҭоит аҿар рпатриоттә ааӡара. Ареспублика бџьаршьҭыхрала ахьыԥшымра ахьчара алшеит. Урыстәылеи Аԥсни Аџьынџьтәылатәи еибашьра Дуӡӡа агәалашәара анаунагӡара азы иҟарҵо даараӡа ирацәоуп», - ҳәа инаҵшьны иазгәеиҭеит Алеқсандр Беглов.
Уи ҩаԥхьа иазгәеиҭеит петербургтәи аиҳабыратә классқәа рҵаҩцәа есышықәса апатриоттә експедициа «Атәылахьчаратә мҩахәасҭа» («Оборонная тропа») шымҩаԥырго. Иазгәаҭатәуп, ари аекспедициа Аԥсны иахьаҵанакуагьы ишымҩаԥысуагьы. Иҳаҩсыз ашықәс азы аекспедициа Кавказ ахақәиҭтәра азы аиҿагылара аҿы аиааиара агара Амш 80-шықәса ахыҵра азгәаҭара иазкын.
