Аҟәа. Нанҳәамза 2, 2024 шықәса. Аԥсныпресс. С.Ҷанба ихьӡ зху Аԥснытәи аҳәынҭқарратә драматә театр лаҵарамза, 2025 шықәсазы Ареспублика Мари Ел аҳҭнықалақь Иошкар-Олы имҩаԥысраны иҟоу Жәларбжьаратәи амилаҭтә тетарқәа рфестиваль ахь ааԥхьара аиуит, ҳәа Аԥсныпресс ахь адырра ҟаиҵеит атеатр адиректор Хада Алхас Ҷолокуа.
Аԥшьаша, нанҳәамза 1 азы Аԥснытәи адраматә театр анапхгаҩи Ареспублика Мари Ел Анапхгара ахантәаҩы ихаҭыԥуаҩ, акультура, акьыԥхьи амилаҭқәа русқәеи рзы аминистр Константин Иванови реиԥылара мҩаԥысит.
Амилаҭтә театрқәа Жәларбжьаратәи рфестиваль «Маятул» («Амца») Иошкар-Олы ақалақь аҿы 1992 шықәса раахыс имҩаԥысуеит. Аусҩаԥгатә аԥҵаҩцәас иҟоуп Урыстәылатәи Афедерациа акультура Аминистрреи Ареспублиа Мари Ел акультура Аминистрреи.
Аԥхьанатә уи афинна-угортә жәларқәа ртеатрқәа рфестиваль акәын. Аха аԥҵаҩцәа рыӡбамҭала, иааиуа ашықәс инаркны афестиваль аҳәаақәа аҽарҭбаауеит, уи амилаҭтә театрқәа Жәларбжьаратә рфестивальны иҟалоит.
