Аҟәа. Нанҳәамза 3, 2024 шықәса. Аԥсныпресс. Нанҳәамза 2 рзы Аԥсны Аҳәынҭқарра Ахада Аслан Бжьаниа Урыстәыла Аҳаир-десанттә ар аԥҵоижьҭеи 94 шықәса аҵра инамаданы Санкт-Петербург имҩаԥысуаз аныҳәатзә усмҩаԥгатәқәа дрылахәын. Аусмҩаԥгатәқәа традициала ишаԥу еиԥш ар аинрал Васили Маргелов ихьӡ зху асквер аҟны ихацыркхеит ахәаша, нанҳәамза 2 рзы.
Аҳәынҭқарра Ахада Аслан Бжьаниа иаҵшьны иҳәеит ари аныҳәа ԥыхьатәи Асоветтә еидгыла ареспубликақәа зегьы рыҟны ишазгәарҭо.
«Аҳаир-десанттә ар ҳзеиԥш тәыла ду арбџьар мчқәа рыҩныҵҟа илыԥшааху архәҭақәа рахь иԥхьаӡан есқьынгьы», - ҳәа иазгәеиҭеит Аҳәынҭқарра Ахада.
Адесантуааи, аветеранцәеи, ақалақьуааи аԥсшәа реиҳәеит Агубернатор Александр Беглов.
«Ленинградтәи арратә округ – атәыла аҳаир-десанттә аршьаҟа аԥсадгьыл ауп, ароуп раԥхьаӡатәи авиациатә десанттә отриад ахьаԥҵаз», - ҳәа иҳәеит агубернатор.
Аныҳәа иацҵан Петропавловтәи абаа аҩныҵҟа, ара иагьымҩаԥысит аиубилеитә акциа «Агвардееццәа ахәыҷқәа рзы».
Аусмҩаԥгатә ахыркәшамҭаз иара убас Аслан Бжьаниеи хьӡи-ԥшеи змоу Аҳаир десанттә ар 345-тәи аполк аветеран Александр Герашьенкои шьыбжьтәи Петропавловтәи абаа абзарбзан аҟнытә аицҭырҟьа ҟарҵеит.
