Аԥсны Анапхгара ахаҭарнакцәа рықәгылараҿы иара убас алагер алаҳәцәа зегьы гәыблыла аԥсшәа раҳәо, иазгәарҭеит, ҳџьынџьуаа рабдуцәа, рабацәа  аамҭаказы изныҵхьаз рыԥсадгьыл аҭаара даара ишыхҭыс дуу, ари акырӡа ишеигәырӷьаз. Иҭабуп ҳәа рарҳәеит алагерь аиҿкаара зыбзоуроу Арепатриациазы аҳәынҭқарратә Еилакы анапхгареи аколлективи, иара убас Гәдоуҭа ақалақь администрациа ахада Валери Аҩӡбеи С. П. Дбар ихьӡ зху Аԥсны Аџьынџьтәылатә еибашьра  аҳәынҭқарратә музеи адиректор Гәыгәыца Џьыкырԥҳаи, ахәаанырцәынтәи иааз ҳџьынџьуаа гәаартыла иахьырԥылаз.

Аҿар ракәзар  рҭоурыхтә ԥсадгьыл аҟны рыҟазаара шгәахәароу, Аԥсны ауаажәларреи, аԥсабара аԥшӡареи  акыр ишыхнахыз рҳәеит.

Аиԥылара ахыркәшамҭазы Аԥсны Аҳәынҭқарра аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанбеи  Аԥсны Аҳәынҭқарра Ахада Иусбарҭа анапхгаҩы ихаҭыԥуаҩ  Зураб Қаџьаиеи Аԥсны Аҳәынҭқарра Ахада ихьӡала алагер алахәцәа ҳамҭас ирырҭеит ашәҟәы - афотоальбом «Ахьыԥшымра».

Асабша, нанҳәамза 3 рзы ҳџьынџьуаа Очамчыра ақалақь иаҭаараны иҟоуп. Араҟа дара ирзыԥшуп инарҭбаау агәырҿыхаратә программа.