Аҟәа. Ԥхынгәымза 31, 2024 шықәса. Аԥсныпресс. «1992-1993 шш. Аԥсны жәлар Рџьынџьтәылатәи еибашьреи Ареспублика Аԥсны иахьаҵанакуа имҩаԥысуаз аибашьратә хҭысқәеи рветеранцәа рзы» азакәани, «1992-1993 шш. Аԥсны жәлар Рџьынџьтәылатәи еибашьра аветеранцәеи аинвалидцәеи иҭахаз рҭаацәеи зыԥсҭазаара иалҵыз аинвалидцәа рҭаацәеи ртәанчахәытә еиқәыршәара азы» азакәани аиҭакрақәа ралагаларазы азакәан апроектқәа реиқәыршәаразы аусуратә гәыԥ аилатәара мҩаԥысит аҩаша, ԥхынгәымза 31 азы.
Аилатәара мҩаԥигон атәылахьчареи амилаҭтә шәарҭадареи рзы апарламенттә Еилакы ахантәаҩы, иара убасҵәҟьа иарбоу аусуратә гәыԥ ахантәаҩыс иҟоу Ҭемыр Шергелиа.
Аусуратә гәыԥ аилатәара аихшьаалақәа рыла абарҭ аӡбамҭақәа рыдыркылеит:
– Аветеранцәа рзы Иаку аҳәынҭқарратә реестр аԥҵара азы атәылахьчара Аминистрра 1992-1993 шш. Аԥсны жәлар Рџьынџьтәылатәи еибашьреи Ареспублика Аԥсны иахьаҵанакуа имҩаԥысуаз аибашьратә хҭысқәеи рветеранцәа реиҭашәҟәҭаҩра мҩаԥнагароуп;
– Атәылахьчара Аминистрра архив аҿы аусшәҟәқәеи аусқәеи рдырра абаза ашьақәыргылареи урҭ рыԥхьаӡацркреи азы иахәҭоу амаругақәа рышьақәыргылареи апрограмматә еиқәыршәара алыршареи рзы аснагӡатәқәа мҩаԥгазароуп;
– аветеранцәа реиҭашәҟәҭагалара иадҳәалоу аусура амҽхак ахьыҭбаау инамаданы аусуратә гәыԥ аусура ахыркәшара аҽҳәара нанҳәамза 1, 2024 шықәса аҟынтәи жәабранмза 1, 2025 шықәсанӡа аиагара. Убри аан уи азы Апарламент Ақәҵара аиҭакрақәа алагалатәуп.
