«Апрограмма аҭагылазаашьа ашьашәалара азы имҩаԥгаз агәаҭарақәа реихшьаалақәа рыла ишьақәыргылан азеиԥш рбагақәа. Зынӡа зеицҵалыҵ 398 977 726 мааҭ рҟынӡа инаӡо аинвестициатә проектқәа  рыдгалара мҩаԥган.  Иалаҵаз арзаҳалқәа рыла иаҭаххо асубсидиақәа реицҵалыҵ 256 912 395 мааҭ рҟынӡа инаӡоит», – ҳәа адырра ҟалҵеит Кристина  Озган.

Акомиссиа   зыдгалара мҩаԥгаз 280 зыҳәамҭа рҟынтәи  170 аҳәынҭқарратә дгылара аҭаразы аӡбамҭа аднакылеит.

«Аминистрцәа Реилазаара иҟоу ақәҵара ала аусхкқәеи апроектқәа рыхәԥсақәеи алимитқәа ахьышьақәырӷәӷәоу инамаданы, иалкаахаз апроектқәа асубсидиақәа рзоуҳажьырц азы аусхкқәа рыла аԥаратә хархәагақәа  аиҭеихшара мҩаԥгатәуп», – ҳәа илҳәеит Кристина Озган.   

Убри аан лара лажәа иацҵо азеиԥш еицҵалыҵ аҿы алимит 100 миллион мааҭ рҟынӡа инаӡоит, уи аԥхьанатә иазԥхьагәаҭаз апрограмма иақәшәоит ҳәа иазгәалҭеит. Аус злоу азеиԥш лимит аҳәаақәа ирҭагӡаны аиҭеихшара ауп, убри аан уи азы  иназыцҵоу афинансыркара аҭахны иҟам.

Иҿыцу аредакциа аҿы Апрограмма V аҟәша иаҳәоит: 

«Апрограмма афинансыркра ахыҵхырҭаны иҟоуп ареспубликатә биуџьет аҟынтәи аԥаратә хархәагақәа. Урҭ рзеиԥш еицҵалыҵ 100 млн. мааҭ рҟынӡа инаӡоит, урҭ рахьынтә абарҭ аусхкқәа рынагӡара азы аиқәыршәагақәа раахәара азы иҟалаз ахарџьқәа рхарҭәаара азы аҳәынҭқарратә финанстә дгылара ахь иазырхахоит:

1) анапҟазареи жәлар рнапҟазареи – 2 493 640 мааҭ;

2) ааглыхреи амаҵзурақәа рынагӡареи – 33 561 574 мааҭ;

3) азеиԥш крыфарҭақәа русура – 19 847 286 мааҭ;

4) атуризм – 44 097 500 мааҭ».