«Ҳара ҳааигәа-сигәа иҟоу аҵакырақәа – Гагра, Афон Ҿыц, Аҟәа рԥышәа ҭаҳҵааит. Уаҟа ас еиԥш иҟоу аконтеинерқәа шьақәдыргылахьеит. Урҭ ахьгылоу еиҳа ицқьахоит, ауаагьы агәам-сам акаԥсара еиҳа ирзыманшәалоуп.  Иара убас ас еиԥш иҟоу аконтеинерқәа хра злоу аган ҳәа иԥхьаӡоуп урҭ рҿы агәам-сам акыраамҭа иахьаанымхо, избан акәзар, агәам есыҽны иқәыргоит», – ҳәа еиҭеиҳәеит Амуниципалтә Унитартә Наплакы Анхара-Коммуналтә Нхамҩа аиҳабы Ҭемыр Ныҷҟьебиа.

Агәам есыҽны иқәыргоит, аха иҟоу атехника уи иацәыуадаҩуп. Уаанӡа иҟаз агәам-сам ықәызго амашьынақәа ацрыҵқәа еиҵакәаҳаны иҟанаҵаӡом, уи аусура аеффективра армаҷуеит. Агәам-сам аиҵаҟәаҳараан машьынак иҭагӡо агәам-сам 40% рыла еиҳахоит.  Араион Ахадара ҳаамҭа иақәшәо, агәам-сам аиҵаҵакәаҳареи аконтеинерқәа рышьҭыхреи рзы автоматизациа зызу амеханизмқәа рыла еибыҭоу иҷыдоу атехника аахәара азԥхьагаҭаны иамоуп.

Иҿыцу акоммуналтә техника аахәара анаҩс араион Ахадара  инацҵаны даҽа 100 цырак инарзынаԥшуа аконтеинерқәа раахәара азԥхьагәаҭаны иамоуп.