«Мысратәи ахәадақәа аԥаҩ ала инҵәоит – амшын ахь ихоу иҿҟьарсҭоу аҟәарала. Уи даара анырра ӷәӷәа змоу азона аҿы иҟоуп. Араатәи аҿыбгарсҭаратә дгьылхәҭақәа рҿы – изеиԥшразаалак аргыларақәа, абна ахшьаара, адгьыл аҿыгҳара аԥхасҭа аҭара – хымԥада урҭ активла рҿыбгара, адгьылҳәазара ахь ицәырнагоит. Ари баша ԥхьаҟа иҟало азԥхьагәаҭара акәӡам, ари аргыларақәа ахьымҩаԥгаз иарбоу аҭыԥқәа рҿы иахьа иҟоу аҭагылазаашьа ауп», - ҳәа иҳәеит Роман Дбар.
Иара игәаанагарала, ари аҵакыра зынӡа иарбанызаалак анхамҩатә усура азы аркреи Мысратәи ахәадақәа иҿыбгарсҭоу аҵакыра зегьы ахьамҽханакуа аԥсабаратә абчарахырҭаны (аҳәырԥсарраны) аҟаҵареи ахәҭоуп. Алеқсандр Анқәаб аекологиа Аинститут иарбоу апроблема ала иахәҭоу аилыркаа еиқәнаршәарц азы адҵа ҟаиҵеит.
