Аҟәа. Ԥхынгәымза 30, 2024 шықәса. Аԥсныпресс. Аҟәа араион Ԥсҳәы ақыҭан иҟоу абылрацәыхьчара-еиқәырхаратә Ԥыԥшырҭа ахатәы еилазаара рԥылараҿы Лев Кәыҵниа изаамҭанытәиу аусқәа рцашьеи иҟоу аҭагылазаашьеи рзы адырра ирҭеит, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.
«Ақыҭа агеографиатә ҭагылазаашьеи, уи иадҳәаланы иҷыдоу аҭагылазаашьақәа аоперативра рызхьаԥшра аганахьала иҟоу аҷыдарақәеи ҳасаб азуны, Лев Кәыҵниа Ԥсҳәытәи абылрацәыхьчара-еиқәырхаратә Ԥыԥшырҭа аҿы амедицинатә маҵзура аҩаӡара ашьҭыхра азы аӡбамҭа идикылеит», – ҳәа иазгәаҭоуп ацҳамҭа аҿы.
Убри азы аԥыԥшырҭа ирласы амедицинатә цхыраара амашьына ала еиқәыршәоуп, иара убас аԥыԥшырҭа аштат инацҵаны иалагалахоит афелшер, амашьынарныҟәцаҩ, аҷаԥшьаҩы-адиспетчер рмаҵураҭыԥқәа.
Ԥсҳәы ақыҭа ахада диԥыло Ареспублика Аԥсны Иҷыдоу аҭагылазаашьақәа рзы аминистр ақыҭаҿы иҿыцу абылрацәыхьчара-еиқырхаратә хәҭа аргылара азҵаарақәагьы дрылацәажәеит.
