Атехника ҷыда аахәара инамҩатәны агараж аргыларагьы мҩаԥысуеит.
«Агараж аҟазаара хымԥадатәиуп атехника адәы иқәымхарц, иԥхасҭамхарц азы. Араҟа иҟалоит арлашара, амашьынақәа реиҭашьақәыргыларатә усурақәа рымҩаԥгаразы ахәаԥшырҭатә ажра, иара убас автомашьынақәа рыӡәӡәарҭа. Агараж иаклоит 9 цырак рҟынӡа иҷыдоу акоммуналтә техника», - ҳәа инаҵшьны иазгәеиҭеит Амуниципалтә Унитартә Наплакы Анхара-коммуналтә Усбарҭа аиҳабы ихаҭыԥуаҩ Ҭемыр Наҷҟьебиа.
Ахатәы техника аахәара араион иҷыдоу аҭагылазаашьақәа раан аоперативла аусура амҩаԥгареи, иара убри ала уаанӡа атехника қьырала агара иақәхарџьхоз абиуџьеттә ԥаратә хархәагақәа аекономиа аҟаҵареи алнаршоит. Иара убас атехника ҿыц араион ауааԥсыра рыбзазаратә зҵаарақәа рыӡбараҿы ирыхәоит.
Ари амодернизациа, Гәылрыԥшь араион Ахадараҿы ишырыԥхьаӡо ала, араион акоммуналтә инфраструктура аҿиара аҿы акыр зҵазкуа шьаҿаны иҟалеит, уи аҭыԥантәи ауааԥсыра рынхашьа аиӷьтәреи иҟалар зылшо еиуеиԥшым аԥсабаратә цәырҵрақәа рызыҟаҵареи алнаршоит.
