Аҟәа. Ԥхынгәымза 26, 2024 шықәса. Аԥсныпресс. Аԥсны Аӡбарҭа анагӡаҩцәа Рмаҵзура 2024 шықәса актәи азыбжа азы аусура аихшьаалақәа рыҟаҵара иазкын аиустициа аминистр ихаҭыԥуаҩ Руслан Лагәлаа ихантәаҩрала имҩаԥысыз аилатәара, ҳәа адырра ҟанаҵоит аиустициа Аминистрра апресс-маҵзура.
Убас, арҭ амзақәа ирылагӡаны аӡбаратә анагӡаҩцәа ауалқәа дыршәара иазкны инарыгӡаз аусура иалҵшәаны 257, 509 693 млн. мааҭ зыртәоз 841 ус хыркәшан. Фактла фымз рыла 111, 696 014 млн мааҭ рылгоуп.
2023 шықәса актәи азыбжа иаҿырԥшны уахәаԥшуазар, аизҳара 12 364 853 мааҭ рҟынӡа инаӡеит.
2024 шықәса фымз рыҩныҵҟа ирылгаз, анаҩс аҳәынҭқарратә биуџьет ахь ахыԥхьаӡалара иазку аԥаратә хархәагақәа рзеиԥш еицҵалыҵ 73 869 162 мааҭ рҟынӡа инаӡоит. Уи иҳаҩсыз ашықәс аиԥш-зеиԥшу аамҭахәҭа азы абиуџьет иалагалаз аицҵалыҵ аасҭа акыр еиҳауп.
2024 шықәса аҳасабырбатә аамҭахәҭа азы аиуристтә хаҿқәеи хазхаҭалатәи ахаҿқәеи рзы иалгаз аԥаратә хархәагақәа реицҵалыҵ 37 826 852 рҟынӡа инаӡоит, уи 12 034 214 мааҭ рыла еиҳауп иҳаҩсыз ашықәс арбагақәа раасҭа.
Аилатәара аихшьаалақәа ҟаҵо аиустициа аминистр ихаҭыԥуаҩ аӡбаратә анагӡаҩцәа Рмаҵзура аусзуҩцәа русура ахә ҳаракны ишьеит, «хра злоу адинамика аныԥшуеит» ҳәа иазгәеиҭеит. Уи ҩаԥхьа Аӡбарҭа анагӡаҩцәа Рмаҵзура ааӡаԥсақәа ралхра еиԥш иҟоу аусура ахырхарҭа дазааҭгылеит.
Аилатәара ахыркәшамҭаз Руслан Лагәлаа Амаҵзура ахатәы еилазаара инарыгӡаз аусура азы иҭабуп ҳәа реиҳәеит. Убри аан уи аусура ахаҭабзиареи аусура аиҿкаареи еиҳа аҩаӡара ашьҭыхра ҷыдала ахшыҩзышьра шаҭатәу азгәеиҭеит.
