Аҟәа. Ԥхынгәымза 25, 2024 шықәса. Аԥсныпресс. Мрагыларатәи Аԥсны апартаментқәа рыргылара азы Азакәан апроект ахәаԥшраҟнытә шьҭахьҟа архынҳәреи уи иазку азакәанԥҵаратә процесс аринахыс аанкылареи рзы аӡбамҭа адкылара атәыла аҿы ишьақәгылаз аиҿагыларақәа раԥыхреи аҭагылазаашьа аҭышәныртәалареи иадҳәалоуп, ҳәа аҳәамҭа ҟанаҵоит Жәлар Реизара-Апарламент апресс-маҵзура.
«Акыраамҭатәи аилацәажәарақәеи апарламент аҩныҵҟатәи аиҿцәажәарақәеи ирылҵшәаны, ауаажәларра, раԥхьа иргыланы, Абыргцәа Рхеилак, Аԥсны Аџьынџьтәылатә еибашьра Афырхацәа, аҭҵаарадырратә еидгыларақәа, аинтеллигенциа, иара убас егьырҭ атәылауаа рхаҭарнакцәа «Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхра иазку ауснагӡатәқәа рзы» Азакәан апроект ахәаԥшра азҵаара агәҭынчымра зызцәырнагаз зегьы ргәаанагара ҳазхәыцны, иқәгылоу азҵаара аҵакы ҳасаб азуны, ишьақәгылаз аиҿагыларақәа раԥыхреи аҭагылазаашьа аҭышәныртәалареи хықәкыс иҟаҵаны, Азакәан апроект аԥшьызгаз азыӡба рыдыркылеит иалагалоу азакәанапроект ахәаԥшраҟнытә шьҭахьҟа архынҳәреи уи иазку азакәанԥҵаратә процесс аринахыс аанкылареи рзы.
Аԥсны Жәлар Реизара – Апарламент адепутатцәа азакәанапроект аԥшьызгаз рколлегацәа иҭабуп ҳәа рарҳәоит иуадаҩу аҭагылазаашьа алҵразы ари азҵаара ҭакԥхықәрала иахьазнеиз азы.
Адепутатцәа иҭабуп ҳәа рарҳәоит Аҧсны жәлар ари азҵаараҟны иаадырҧшыз ахдырра ҳараказы, убри аан иаҵшьны иазгәарҭарц рҭахуп ихадараны ишырыԥхьаӡо аҳәынҭқарраҿы ахшыҩеилаҵареи аҭышәынтәалареи реиқәырхара»», - ҳәа иаҳәоит аҳәамҭа атекст аҿы.
